Deepak Kulkarni
पुणे महापालिकेत काही दिवसांपूर्वी गणेशोत्सवाच्या पूर्वतयारी बैठकीत DJ आणि कर्णकर्कश साऊंड सिस्टीमच्या वापरावरून मोठा वादंग निर्माण झाला.
शहरातील नारायण पेठेत राहणाऱ्या विद्यानंद बापट यांनी पुण्यातील सार्वजनिक गणेशोत्सवात ध्वनिप्रदूषण आणि वाहतुकीला अडथळा होणार नाही, याची काळजी घेण्याची मागणी करताच वातावरण तापलं.
त्यांची डीजे आणि लाऊड स्पीकरविरोधातील मागणी समोर येताच त्यांना महापालिकेच्या बैठकीत प्रचंड रोषाला सामोरे जावे लागले. पोलिसांना त्यांच्याभोवती सुरक्षेचे कडे उभे राहावे लागले. तसेच त्यांना बैठकीतून बाहेर काढण्यात आले.
लाऊडस्पीकर, DJ किंवा इतर ध्वनीवर्धनाची साधने सार्वजनिक ठिकाणी वापरली जाऊ नयेत आणि गणेशोत्सवातील मंडप अन् मिरवणुकांमुळे वाहतुकीला अडथळा होऊ नये या भूमिकांमुळे बापट पुणेकरांचा 'खरा आवाज' बनले आहे.
बापट यांच्यामते दरवर्षी गणेशोत्सवाच्या काळात न्यायालयाच्या आदेशानुसार, ‘डॉल्बी’, ‘DJ' ,लाऊड स्पीकर बंदी अशा वेगवेगळ्या शब्दांमधून फक्त चर्चा होत राहते; मात्र, तांत्रिक नाव बदलून हैदोस सुरूच राहतो. त्यामुळे मूळ समस्या सुटत नसल्याचं त्यांचं म्हणणं आहे.
केवळ डीजे किंवा इतर ध्वनीवर्धकांच्य़ा डेसिबलची मर्यादा तपासण्यापेक्षा न्यायालयाचा मूळ उद्देश लक्षात घेत सार्वजनिक ठिकाणी त्याची अंमलबजावणी होणं गरजेचं असल्याचंही त्यांनी म्हटलं आहे.
डीजेविरोधात घेतलेल्या या भूमिकेमुळे बापटांवर ते हिंदूविरोधी असल्याचे आरोप केले जात असून ते हास्यास्पद असल्याचंही बापट सांगतात.
ते असंही स्पष्टपणे म्हणतात की, धर्मस्वातंत्र्याला माझा विरोध नसून, सार्वजनिक ठिकाणी उत्सव साजरा करताना ध्वनिप्रदूषण आणि वाहतुकीचा अडथळा ठरू नये.
विद्यानंद बापट हे कंपनीत नोकरीला असून गणेशोत्सवातील डीजेला विरोध करतानाच शांत,संयमी,अभ्यासू अन् मुद्देसूद मांडणीमुळे सध्या चर्चेत आले आहे. त्यांच्या भूमिकेला पेठेतील पुणेकर, पर्यावरणवादी, सामाजिक संस्था, संघटनांचा मोठा पाठिंबा मिळतो आहे.