Jagdish Patil
विधानसभेच्या पार्श्वभूमीवर महायुतीत जागावाटपावरून नाराजीनाट्य सुरू असतानाच अजित पवारांच्या राष्ट्रवादीचे नेते नाना काटे यांनी चिंचवड विधानसभा लढवण्याचा निर्धार केला आहे.
मात्र, सध्या भाजपच्या अश्विनी जगताप चिंचवडमधून आमदार आहेत. त्यामुळे ही जागा भाजपला गेल्यास पुढील निर्णय घेऊ, असं काटेंनी म्हटलं आहे.
त्यामुळे ते 'तुतारी' हाती घेणार असल्याची चर्चा रंगली आहे, असं झाल्यास हा अजितदादांसाठी मोठा धक्का असू शकतो.
पिंपरी-चिंचवड अजितदादांचा बालेकिल्ला आहे. तर, नाना काटे हे चिंचवडमधील अजितदादांचे खंदे समर्थक म्हणून ओळखले जातात.
काटेंना 2023 मधील पोटनिवडणुकीत अश्विनी जगताप यांच्याविरोधात NCP कडून उमेदवारी देण्यात आली होती. यावेळी त्यांना पराभवाचा सामना करावा लागला होता.
राष्ट्रवादीमध्ये फूट पडल्यानंतर ते अजितदादांसोबत राहिले. तर निवडणूक लढवण्याची इच्छा व्यक्त करताच चर्चेत आलेल्या नाना काटे यांची राजकीय पार्श्वभूमी जाणून घेऊया.
विठ्ठल (नाना) कृष्णाजी काटे हे राजकारणात गेल्या 20 वर्षांपासून सक्रिय आहेत. 2007 सालापासून महानगरपालिकेत नगरसेवक म्हणून कार्यरत आहेत.
नाना काटे हे वारकरी संप्रदायाशी निगडित असल्याने त्यांना मानणारा मोठा वर्ग चिंचवड शहरात आहे. 2014 साली त्यांनी चिंचवड विधानसभा लढविली आहे.