Rashmi Mane
आधार कार्ड आज बँकिंग, सरकारी योजना, मोबाईल सिम आणि अनेक महत्त्वाच्या सेवांसाठी आवश्यक झाले आहे. मात्र, वाढत्या वापरासोबत गैरवापराचा धोकाही वाढला आहे. त्यामुळे तुमचा आधार कोण वापरत आहे, हे जाणून घेणे महत्त्वाचे ठरते.
भारतीय विशिष्ट ओळख प्राधिकरण (UIDAI) नागरिकांना आधार ऑथेंटिकेशन हिस्ट्री पाहण्याची सुविधा देते. यामुळे तुमचा आधार कधी, कुठे आणि कोणत्या कारणासाठी वापरण्यात आला याची माहिती मिळू शकते.
ही सुविधा पूर्णपणे ऑनलाइन उपलब्ध आहे. मोबाईल, लॅपटॉप किंवा डेस्कटॉपच्या मदतीने काही मिनिटांत तुम्ही आधार वापराचा संपूर्ण इतिहास तपासू शकता.
My Aadhaar पोर्टलवर जा. 12 अंकी आधार क्रमांक टाका आणि नोंदणीकृत मोबाईलवर आलेला OTP भरून लॉगिन करा. त्यानंतर Authentication History हा पर्याय निवडा.
तुम्ही आवडीची तारीख निवडून मागील 6 महिन्यांपर्यंतचा रेकॉर्ड पाहू शकता. बायोमेट्रिक, OTP किंवा सर्व प्रकारच्या ऑथेंटिकेशनची माहिती येथे उपलब्ध असते.
आधारचा वापर कोणत्या माध्यमातून झाला, तारीख आणि वेळ काय होती तसेच कोणत्या बँक, टेलिकॉम कंपनी किंवा सरकारी विभागाने पडताळणी केली याची सविस्तर माहिती रिपोर्टमध्ये दिसते.
UIDAI बायोमेट्रिक लॉकची सुविधाही देते. फिंगरप्रिंट आणि आयरिसची माहिती लॉक केल्यास तुमच्या परवानगीशिवाय कोणीही बायोमेट्रिक ऑथेंटिकेशन करू शकत नाही.
ऑथेंटिकेशन हिस्ट्रीमध्ये अनोळखी नोंद आढळल्यास तात्काळ UIDAI हेल्पलाइन 1947 वर संपर्क करा, ऑनलाइन तक्रार नोंदवा आणि बायोमेट्रिक डेटा लॉक करा. नियमित तपासणी केल्यास फसवणूक आणि डेटा गैरवापरापासून स्वतःचे संरक्षण करता येते.