Maharashtra News Live Update: Nagpur: राज्यातील विजेची मागणी २५ हजार मेगावॉटच्या उंबरठ्यावर

मोशीतील इमारत दुर्घटनेनंतर प्रशासनाच्या भूमिकेवर प्रश्नचिन्ह निर्माण झाले आहे. अनेक कामगारांचा मृत्यू झाल्यानंतरही जबाबदार व्यक्तींवर कठोर कारवाई झालेली नसल्याची टीका होत आहे. काही अधिकाऱ्यांवर कारवाई झाली असली तरी सुरक्षा नियमांकडे झालेल्या दुर्लक्षासाठी नेमके दोषी कोण, याबाबत नागरिकांमध्ये अजूनही संभ्रम आणि नाराजी आहे.

सातबारा उताऱ्यामध्ये कायद्याचा गैरवापर करून 'चलाखी' करणाऱ्या महसूल विभागातील अधिकाऱ्यांचे धाबे आता दणाणले आहेत. महाराष्ट्र जमीन महसूल अधिनियम १९६६ च्या कलम १५५ चा गैरवापर करून बेकायदेशीर आदेश देणाऱ्या १५ अधिकाऱ्यांचे निलंबन झाल्यानंतर, आता तब्बल ८४ अधिकारी शासनाच्या रडारवर आले आहेत. यामुळे महसूल वर्तुळात मोठी खळबळ उडाली असून अनेकांचे धाबे दणाणले आहेत.

वर्ध्याच्या रोठा शिवारातील धक्कादायक घटना घडली आहे. परिसरात खळबळ उडाली आहे. एका 12 वर्षीय अल्पवयीन मुलीची दगडाने ठेचून हत्या करण्यात आली असल्याचे माहिती समोर येत आहे. आधी मुलीवर अत्याचार करून तिचा दगडाने ठेचून खून करण्यात आल्याचा संशय पोलिसांनी व्यक्त केला आहे.

संसदेचे पावसाळी अधिवेशन सोमवारपासून (20 जुलै) सुरू होत आहे. अधिवेशन 13 ऑगस्टपर्यंत चालणार आहे. अधिवेशन सुरू होण्यापूर्वी लोकसभा सचिवालयाने सर्व खासदारांसाठी महत्त्वाचे परिपत्रक जारी केले आहे. संसद परिसरात स्मार्ट घड्याळे, स्मार्ट चष्मे, पेन कॅमेरे आणि रेकॉर्डिंग करू शकणाऱ्या इतर इलेक्ट्रॉनिक उपकरणांच्या वापराबाबत कडक सूचना दिल्या आहेत.

मुंबईत पाऊस थांबला असला तरी आजारांचा धोका वाढला आहे. जानेवारी ते १४ जुलै या कालावधीत मलेरिया, डेंग्यू, लेप्टोस्पायरोसिसच्या रुग्णसंख्येत वाढ होत असल्याची माहिती महापालिकेच्या सार्वजनिक आरोग्य विभागाने दिली. अनेक भागांत साचलेल्या दूषित पाण्यामुळे विशेषतः लेप्टोस्पायरोसिसचा संसर्ग होण्याचा धोका वाढल्याने नागरिकांनी पाण्यातून चालणे टाळावे, आवश्यक असल्यास डॉक्टरांच्या सल्ल्याने प्रतिबंधक औषधे घ्यावीत, असे आवाहन महापालिकेने नागरिकांना केले आहे.

पर्वती येथील शाहू वसाहत (सर्व्हे क्र. ९२) येथील पुनर्वसन प्रकल्पाबाबत प्रकरणाची सुनावणी आज होणार आहे.त्यामुळे नागरिकांनी कोणत्याही दिशाभूल करणाऱ्या माहितीवर किंवा अफवांवर विश्वास ठेवू नये, असे आवाहन करण्यात आले आहे. या प्रकल्पासंदर्भातील सर्व कार्यवाही सध्याच्या कायदेशीर तरतुदी आणि प्रक्रियेनुसारच सुरू होती. प्रकल्पाच्या कायदेशीर प्रक्रिये दरम्यान सध्या या योजनेला तात्पुरती स्थगिती देण्यात आली आहे. या स्थगितीबाबत सक्षम प्राधिकरणा समोर आज सुनावणी होणार असून, त्यानंतर पुढील अधिकृत निर्णय घेतला जाणार आहे.