Dhananjay Munde News: धनंजय मुंडेंना सर्वात मोठा दिलासा; 'या' प्रकरणी दाखल खटला पुनर्जीवित करण्यास स्थगिती

Beed News : जगमित्र शुगर्स या प्रस्तावित कारखान्यासाठी जमीन खरेदी प्रकरणात माजी मंत्री तथा आमदार धनंजय मुंडे यांच्यासह तिघांविरुद्ध फसवणूक केल्याच्या खटला दाखल करण्यात आला होता. आता याप्रकरणी अंबाजोगाई न्यायालयानं धनंजय मुंडे (Dhananjay Munde) व अन्य तिघांना दोषमुक्त केलं होतं. त्यावर अंबाजोगाई अतिरिक्त जिल्हा व सत्र न्यायालयात हा खटला पुन्हा सुरू करण्याचा अर्ज केल्यानंतर मंगळवारी (ता.13) तो खटला पुनरुज्जीवित करण्याचा आदेश जिल्हा व सत्र न्यायाधीश यांनी दिला होता.

या निर्णयावर धनंजय मुंडे यांनी केलेल्या अर्जावर सुनावणी घेतल्यानंतर त्याच न्यायालयाने स्थगिती दिली आहे. ॲड. अशोक कवडे यांनी न्यायालयात धनंजय मुंडे यांच्या वतीने स्थगिती अर्ज दाखल केला होता. धनंजय मुंडे यांच्या वतीने मुंबई उच्च न्यायालयाच्या औरंगाबाद खंडपीठात अपील दाखल करेपर्यंत किंवा अपिलाची मुदत पूर्ण होई पर्यंत हा खटला चालविण्यास अंबाजोगाई अतिरिक्त जिल्हा व सत्र न्यायालयाने ही स्थगिती दिली आहे.

माजी मंत्री धनंजय मुंडे यांच्याविरोधात बर्दापूर पोलिस ठाण्यात 2011-12 मध्ये खरेदी केलेल्या या जमिनीच्या प्रकरणात तक्रार देण्यात आली. तत्कालीन परिस्थितीत पोलिसांनी तपास करून तक्रारीत तथ्य न आढळल्याने गुन्हा दाखल करण्यात आला नव्हता.

त्यानंतर उच्च न्यायालयात (High Court) हस्तक्षेप याचिका दाखल करून दोषारोपपत्र दाखल करण्यात आले. या खटल्यात दोन्ही पक्षांचे म्हणणे, साक्ष, पुरावे इत्यादी वस्तुस्थिती पाहून अंबाजोगाई न्यायालयाने धनंजय मुंडे व अन्य तिघांना दोषमुक्त केले होते.

मात्र, त्याविरुद्ध जिल्हा सत्र न्यायालयात आव्हान देण्यात आलं. त्यावर धनंजय मुंडे यांच्या वकिलांनी केलेल्या अर्जावर दोन्ही बाजूंचं म्हणणं न्यायालयानं ऐकल्यानंतर स्थगिती देण्यात आली असून, मुंडे यांना अपील करण्यासाठी पुरेसा वेळ देण्यात आला असल्याचं ॲड. कवडे यांनी सांगीतले.