Ramdas Athawale यांची मोठी घोषणा : शिर्डीतून लोकसभा निवडणूक लढविणार

अहमदनगर - अहमदनगर जिल्ह्यातील शिर्डी लोकसभा मतदार संघातून 2009 साली केंद्रीय मंत्री रामदास आठवले ( Ramdas Athavale ) पराभूत झाले होते. मात्र त्यांनी त्याच मतदार संघातून पुन्हा निवडणूक लढविण्याची इच्छा आज बोलून दाखविली. अहमदनगर येथील शासकीय विश्रामगृहात झालेल्या पत्रकार परिषदेत ते बोलत होते.

रामदास आठवले म्हणाले, शिर्डीतून लोकसभा लढविण्याची माझी इच्छा आहे. जनता, कार्यकर्ते, पदाधिकारी तसेच भाजप व शिंदे गटाची मागणी असेल, मी निवडून येण्याचे वातावरण असेल तर मी तेथून निवडणूक लढेल. भाजप व मित्रपक्षाने मला आग्रह केला तर मी निश्चित शिर्डीतून निवडणूक लढेल, असे त्यांनी सांगितले.

2009च्या निवडणुकीतील आठवणी जाग्या करत ते म्हणाले, निवडणुकीत हारणे,जिंकणे आपल्या हातात नसते. ते जनतेच्या हातात असते. त्यामुळे काही अडचणीमुळे मी शिर्डीत हरलो होतो. हरलो तरी मी नाराज नाही. शेवटी लोकशाहीत हार-जीत असते. यावेळेला मी उभा राहिलो तर चांगल्या मतांनी मी निवडून येईल, असा विश्वास त्यांनी व्यक्त केला.

आठवले यांचा शिर्डी लोकसभा मतदार संघात सहा महिन्यात तिसरा दौरा आहे. शिर्डी लोकसभा मतदार संघात शिवसेनेचे बंडखोर खासदार सदाशिव लोखंडे हे खासदार आहेत. लोखंडे हे भाजपकडून तीन वेळा कर्जत-जामखेड विधानसभा मतदार संघातून आमदार होते. त्यामुळे शिवसेना फुटल्यावर लोखंडे हे शिंदे गटात जातील याची शक्यता होती. त्यानुसार लोखंडे हे शिंदे गटात गेले. अशा स्थितीत आठवले यांना शिर्डीतून निवडणूक लढायची असेल तर भाजप व शिंदे गटाकडून पाठिंबा लागणार आहे.

शिर्डी लोकसभा मतदार संघावर विखे गटाचे प्रभुत्व आहे. तर संगमनेर तालुक्यात थोरातांचे वर्चस्व आहे. 2009च्या निवडणुकीत विखे गटामुळे आठवलेंचा पराभव झाला होता. त्यावेळी आठवले व विखे दोघेही आघाडीत होते. पुन्हा आठवलेंना शिर्डी मतदार संघातून निवडणूक लढवायची आहे. आता आठवले व विखे दोघेही महायुतीत आहेत. त्यामुळे आठवलेंची इच्छा जरी असली तरी परिस्थिती आठवलेंसाठी काय आहे हे महत्त्वाचे ठरणार आहे. या भागात मराठा मतदार संख्येने जास्त आहे. हा मतदार आठवलेंना मतदान करेल का? यावर पुढील गणिते ठरण्याची शक्यता आहे.