राष्ट्रवादीचा पटोलेंवर पलटवार; सत्तेचा माज चढला असेल तर बाहेर पडा!

नागपूर : महाविकास आघाडी सरकार म्हणून जरी एकत्र काम करत असले तरी शिवसेना, काँग्रेस, राष्ट्रवादी काँग्रेस या तिन्ही पक्षांमधील कुरबूरी वरचेवर दिसून येतात. राष्ट्रवादी काँग्रेसचे विदर्भातील एकमेव दुकानही बंद होईल, असे म्हणते काँग्रेसचे प्रदेशाध्यक्ष नाना पटोले यांनी आपल्याच मित्रपक्षाला डिवचले होते. त्यावर आता राष्ट्रवादी काँग्रेस जोरदार उत्तर दिले आहे.

या संदर्भात राष्ट्रवादीचे प्रवक्ते प्रवीण कुंटे यांनी पटोलेंवर हल्ला चढविला आहे. काँग्रेस प्रदेशाध्यक्ष नाना पटोले यांनी मर्यादा ठेऊन बोलावे. जर सत्तेचा माज चढला असेल तर सत्तेच्या बाहेर पडण्याचे आवाहन राष्ट्रवादीने पटोलेंना दिले. नाना पटोले यांनी विदर्भातील राष्ट्रवादी काँग्रेसचे एकमात्र दुकान बंद पडेल असे वक्तव्य अतिशय दुर्दैवी असून त्यांनी त्यांच्या आवाक्याबाहेर वक्तव्य करु नये, असा सल्ला देखील दिला.

जलसंपदा मंत्री जयंत पाटील व उपमुख्यमंत्री अजित पवार यांचे नाव घेण्याची त्यांची लायकी नाही. साकोली विधानसभा मतदारसंघात त्यांचा झालेला निसटता विजय हा राष्ट्रवादी काँग्रेसमुळेच झाला हे त्यांनी विसरु नये, असेही कुंटे म्हणाले. आज राज्यात महाविकासआघाडी सरकारचे शिल्पकार राष्ट्रवादी काँग्रेसचे अध्यक्ष शरद पवार आहेत. पटोलेंमध्ये धमक असेल तर सत्तेच्या बाहेर पडून दाखवावे. शक्य नसेल तर बिनशर्त माफी मागावी, अशी मागणी कुंटे यांनी केली. अजित पवार व जयंत पाटील लोकनेते असून वारंवार पक्ष बद्दलविणाऱ्या नाना भाऊंनी भाजपची सुपारी घेतल्या सारखे बोलू नये, अशी टीका कुंटे यांनी केली.

नाना पटोले म्हणाले होते, राष्ट्रवादीचे सगळे महान नेते असून पंढरपूरमध्ये हरले. आज राष्ट्रवादीचे तिकीट घेवून त्यांचे पश्चिम महाराष्ट्रातील दुकान बंद होत असेल तर बुलडाण्यातील दुकान बंद व्हायला वेळ लागतो किती. एकच तर दुकान आहे बुलडाण्यामध्ये, ते विदर्भातील राष्ट्रवादी काँग्रेसचे एकमेव दुकान बंद व्हायला वेळ लागणार नाही.