सोमय्यांचा परबांना पुन्हा इशारा ; साई रिसॅार्टवरुन वाद पेटला

मुंबई : येत्या काळात शिवसेनेचे नेते, राज्याचे परिवहनमंत्री अनिल परब (Anil Parab)व भाजपचे नेते, माजी खासदार किरीट सोमय्या (Kirit Somaiya) यांच्यातील वाद पुन्हा रंगण्याची चिन्हे आहेत. सोमय्यांनी टि्वट करुन परब यांचे दापोलीतील रिसॅार्ट तोडण्याचा इशारा दिला आहे.

अनिल परब यांच्या दापोली येथील अनाधिकृत रिसॅार्ट, सीआरझेडच्या नियमांचा भग, वन व पर्यावरणाचे नुकसान, सरकारी दस्ताऐवजात खाडाखोड, मंत्रीपदाच्या दुरुपयोग आदी आरोप सोमय्यांनी परब यांच्यावर केला आहे. या रिसॅार्टवर कारवाई व्हावी, यासाठी येत्या २६ तारखेला सोमय्या हे दापोली येथे जाणार असल्याचे टि्वट त्यांनी केलं आहे.

साई रिसॉर्टचे बांधकाम करताना बिनशेती परवानगी, रस्ता, घरपट्टी आदींबाबत नियमांचे उल्लंघन करून केलेले आहे का याबाबतची वस्तूस्थिती तपासण्यास जिल्हाधिकाऱ्यांनी सांगीतले होते. सोमय्या यांनी दापोली पोलिस स्टेशनला परब यांच्या साई रिसॅार्ट विरुद्ध तक्रार दाखल केली आहे.

सोमय्या यांच्या तक्रारीनंतर परब यांच्या साई रिसॉर्टच्या अनधिकृत बांधकामाबाबत वस्तुस्थिती काय आहे. याची खातरजमा करण्याचे आदेश अप्पर जिल्हाधिकाऱ्यांनी काही दिवसापूर्वी दिले होते. मुरुड तालुका दापोली येथील गट क्रमांक 446 येथील साई रिसॉर्ट एनेक्सचे बांधकाम बेकायदेशीर आहे. सीआरझेड कायद्याचे (law of CRZ) उल्लंघन केले असल्याचे सोमय्या यांनी म्हटले होते.

फसवणूक, दस्तावेजात खाडाखोड, करत परब यांनी पदाचा दुरुपयोग केला, असल्याचा आरोप त्यांनी केला होता. सोमय्या यांनी केलेल्या तक्रारीनंतर साई रिसॅार्टच्या अनधिकृत बांधकामाबाबत वस्तुस्थिती काय आहे. याची खातरजमा करण्याचे आदेश रत्नागिरीच्या अप्पर जिल्हाधिकारयांनी दिले होते.

रिसॉर्ट बांधकामासाठी कोट्यवधी रुपये खर्च झाले; मात्र हे पैसे आले कुठून? यावर आयकर विभागाकडून चौकशीदरम्यान आक्षेप घेण्यात आल्याचे दिसते. यासंबंधी आयकर विभागाकडून प्रसिद्ध करण्यात आलेले पत्र किरीट सोमय्या यांनी काल ट्विट केले आहे. 'अनिल परब साहेब आयकरचे म्हणणे आहे की कोट्यवधी रुपये आले कोठून? वाझेचे की खरमाटेचे? असा सवाल सोमय्या यांनी केला आहे. त्यामुळे येत्या काळात अनिल परब व किरीट सोमय्या वाद पुन्हा रंगण्याची चिन्हे आहेत.