यापूर्वीही पवारांनी अशा परिस्थितीतून पक्षाला पुन्हा उभारी दिली आहे : भुजबळ 

मुंबई : " यातूनही पक्ष उभा राहील . शरद पवारांनी  पवारांनी यापूर्वीही अशा परिस्थितीतून पक्षाला पुन्हा उभारी दिली आहे," असा विश्वास राष्ट्रवादी काँग्रेसचे नेते छगन भुजबळ यांनी व्यक्त केला . राष्ट्रवादी काँग्रेसमधून नेते बाहेर पडून भाजप - शिवसेनेत जात आहेत याबाबत प्रतिक्रिया देताना श्री. छगन भुजबळ बोलत होते . 

 छगन भुजबळ पुढे म्हणाले, "  आता जी माणसे सोडून जात आहेत त्याने राष्ट्रवादी काँग्रेसचे नुकसान तर निश्चित आहे . नुकसान झालेले नाही हे म्हणण्यात काही अर्थ नाही . नुकसान तर झालेले आहे. शिवेंद्रराजे काय किंवा पिचड साहेबांचा मुलगा काय  पक्षाचे नुकसान होत आहे . सोडून जाणारयापैकी अनेक नेते जुने काँग्रेसचे नेते आहेत . "

श्री.   भुजबळ म्हणाले ,"आता सोडून चाललेली माणसं वसंतदादांपासून काँग्रेसचे काम करत होती . विजयसिंह मोहिते पाटील आणि पिचड साहेब  काहीजण वसंतदादांची ही खास माणसे होती . निश्चितपणे सामाजिकदृष्ट्याही या माणसांचा अनेक ठिकाणी त्यांचा प्रभाव आहे . सामान्य कार्यकर्ता जरी पक्ष सोडून गेला तर नुकसान होते. ही तर नेते मंडळी आहेत , आमदार आहेत . " 

" पण प्रत्येक निवडणुकीत हे होतं, इकडचा माणूस तिकडे गेला - हा आला, पण आता त्याचं प्रमाण यावेळी वाढलं आहे. पण ठीक आहे .  हे चालू असतं.   यातूनही पक्ष उभा राहील . शरद पवारांनी  पवारांनी यापूर्वीही अशा परिस्थितीतून पक्षाला पुन्हा उभारी दिली आहे , असा विश्वास त्यांनी व्यक्त केला .