लखीमपूर हिंसाचार प्रकरणावर,भाजपकडून मावळ गोळीबाराची आठवण...

मुंबई : लखीमपूर हिंसाचार प्रकरणी राष्ट्रवादी काँग्रेसचे (NCP)अध्यक्ष शरद पवार (Sharad Pawar) यांनी केलेली टीका भाजपली चांगलीच झोबलेली दिसतेय. यावर भाजप नेते आणि माजी अर्थमंत्री सुधीर मुनगंटीवार यांनी प्रत्युत्तर देतांना म्हणाले, काही लोकांना सत्तेपासून वंचित राहावे लागत आहे. म्हणून त्यांच्या पोटात दुखत आहे. लखीमपूरची घटना आणि जालियनवाला बाग हत्याकांड या दोन्ही वेगळ्या घटना आहे आणि चौकशी झाल्याशिवाय या प्रकारची प्रतिक्रिया देणे योग्य नाही. काँग्रेस-राष्ट्रवादीच्या काळात मावळमध्ये शेतकऱ्यांवर गोळ्या झाडल्या होत्या, ते कोण विसरू शकतो? अशा शब्दांत मुनगंटीवार यांनी पलटवार केला आहे.

उत्तर प्रदेशात जालीयनवाला बागसारखी परिस्थिती आहे. देशातील शेतकरी हे कधीही विसरणार नाही, अशा शब्दात शरद पवार यांनी केंद्र सरकारवर निशाणा साधला होता. याबरोबर काँग्रेसचे प्रदेशाध्यक्ष नाना पटोले यांनी लखीमपूर घटनेत भाजपची तालिबानी वृत्ती पाहायला मिळाली. जनरल डायरप्रमाणे भाजपची वागणूक होती,अशी टीका केली होती. यास मुनगंटीवार यांनी मावळातील गोळीबाराची आठवण काढत प्रत्युत्तर दिले.

लखीमपूर हिंसाचार प्रकरणावर बोलताना पवार म्हणाले, उत्तरप्रदेशात जालीयनवाला बागसारखी परिस्थिती आहे, देशातील शेतकरी हे कधीही विसरणार नाहीत. दोन राज्यांच्या मुख्यमंत्र्यांना अडवले जाते, शेतकरी नेत्यांना रोखले जात आहे. हा सत्तेचा गैरवापर केला जातोय. देशातील विरोधी पक्ष शेतकऱ्यांसोबत असेल. देशातील जनता सरकारला धडा शिकवेल. शेतकऱ्यांचा आवाज दाबण्याचा प्रयत्न सुरु आहे, पण भाजपला यात यश मिळणार नाही. देशातला शेतकरी याच केंद्र सरकारला उत्तर देईल. केंद्र असो की राज्य सरकार, या घटनेची संपूर्ण दबाबदारी भाजपची आहे. शेतकऱ्यांना त्यांच्या न्याय हक्कासाठी लढण्याचा, आंदोलन करण्याचा पूर्ण अधिकार आहे, अशी टीका त्यांनी भाजपवर केली होती.

उत्तर प्रदेशातील लखीमपूरमध्ये ता.३ ऑक्टोबर शेतकऱ्यांना चिरडण्यात आले. या घटनेत व यानंतर झालेल्या हिंसाचारात एकूण 8 जणांचा मृत्यू झाला आहे. हिंसाचारात ठार झालेल्या 8 जणांचा शवविच्छेदन अहवाल समोर आला असून, या अहवालानुसार बहुतेक मृत्यू हे जबर मार, शॉक किंवा रक्तस्त्राव होऊन झाले आहेत.