सुनील तटकरे यांनी रात्री दोन वाजता केला चंद्रकांत पाटलांना फोन ..

कर्जत (रायगड):  राष्ट्रवादी काँग्रेसचे नेते सुनील तटकरे यांनी मध्यरात्री दोनच्या सुमारास सार्वजनिक बांधकाम खात्याचे मंत्री आणि भाजपचे नेते चंद्रकांत दादा पाटील यांना फोन केला . या फोनचे कारणही तसेच होते . 

कर्जतचे राष्ट्रवादी काँग्रेसचे आमदार  सुरेश लाड  यांनी  तालुक्यातील रस्त्यांच्या दुरावस्थेबाबत उपोषण सुरु केले होते . पण सुरेश लाड यांची प्रकृती बिघडल्याचे समजताच सुनील तटकरेंनी रात्री उशिरा कर्जत गाठले .  सुरेश लाड यांचे उपोषण कोणत्याही परिस्थितीत तटकरेंना सोडवायचे होते . 

मंगळवारी सकाळी मोठा गाजावाजा करून  अकरा वाजता आमदार सुरेश लाड उपोषणाला बसले . पण दिवसभरात राज्य शासनाने  त्यांच्या उपोषणाची ना दाखल घेतली ना कोणी वरिष्ठ अधिकारी त्यांना भेटायला आले . उपोषण सुरु होऊन ९ - १० तास झाल्यानंतर  दरम्यान लाड यांना रात्री अस्वस्थ वाटू लागले . रात्री साडे दहाच्या सुमारास उपोषणकर्ते आमदार  लाड यांची प्रकृती अचानक खालावली .  उपजिल्हा रुग्णालयाचे अधीक्षक डॉ. संजीव धनेगावे यांनी तपासणी केली असता आमदार लाड यांच्या रक्तातील साखरेचे प्रमाण कमी झाल्याने त्यांना ग्लानी आल्याचे निष्पन्न झाले . ही माहिती राष्ट्रवादी काँग्रेसच्या कार्यकर्त्यांनी सुनील तटकरे यांना कळवली . 

सुनील तटकरे हे रोह्याला  होते . त्यांनी रात्रीच तातडीने  कर्जतला धाव घेतली . रात्री दीडच्या सुमारास ते उपोषणस्थळी पोहोचले . त्यांनी  सुरेश लाड यांना  उपोषण सोडण्याचा आग्रह धरला . पण आपल्या रस्त्यांबाबतच्या मागण्या मान्य  झाल्याशिवाय काही झाले तरी उपोषण सोडणार नाही ,अशी भूमिका लाड यांनी घेतली . या मनधरणीत अर्धा तास गेला . अखेर सुनिल  तटकरे यांनी रात्री दोन वाजता  चंद्रकांत पाटलांना फोन केला. पण चंद्रकांत पाटील यांनी तो फोन उचलला नाही . त्यामुळे पुन्हा पंचाईत झाली . 

मग सुनील तटकरेंनी सार्वजनिक बांधकाम खात्याच्या अनेक अधिकाऱ्यांना रात्री फोन लावले . अखेर मुख्य अभियंता . श्री. भोसले यांच्याशी फोनवर संपर्क झाला . श्री. भोसले यांनी आमदार लाड यांच्या सर्व मागण्या ( तत्वतः ) मान्य  करून बुधवारी सकाळीच कार्यवाही कारण्याचे आश्वासन दिले . अखेर तोडगा निघला आणि आमदार लाड यांनी उपोषण सोडले . पण प्रकृती अस्वास्थ्यामुळे त्यांना रुग्णालयात दाखल करण्यात आले आहे  .