पोलिस ठाण्यात इस्टेट एजंटचा वाढदिवस साजरा : आयुक्त सदानंद दातेंनी दिले चौकशीचे आदेश

नालासोपारा : नव्याने स्थापन झालेल्या मीरा भाईंदर पोलिस आयुक्तालयातील तुळींज पोलीस ठाण्यात एका इस्टेट एजंटाचा पोलीस कर्मचाऱ्यांसोबत केक कापून वाढदिवस साजरा करणे तेथील निरीक्षक दत्तात्रय पाटील यांना भोवले आहे. मीरा भाईंदर आणि वसई- विरारचे आयुक्त सदानंद दाते यांनी पाटील यांच्या विभागीय चौकशीचे आदेश दिले आहेत.

सहायक पोलिस आयुक्त संजयकुमार पाटील यांच्याकडे ही चौकशी देण्यात आली आहे. तुळींज पोलीस ठाण्याचे पोलीस निरीक्षक दत्तात्रय पाटील हे कोरोनाशी झुंज देवून रुजू झाले होते. त्याच दिवशी इस्टेट एजंट सचिन गाला याने केक आणून पोलिस ठाण्यात कापला. याचा व्हिडीओ सचिन यानेच व्हायरल केला. त्यानंतर आयुक्त सदानंद दाते यांनी पाटील यांच्या चौकशीचे आदेश दिले आहेत. याबाबत बोलताना सचिन गाला यांनी सांगितले की माझ्यावर साधी `एनसी` सुद्धा  नाही. मात्र पोलिस हे  गाला याच्यावर कोणत्या पोलीस ठाण्यात गुन्हे दाखल आहेत का, याचा शोध घेत आहेत. हा केक पाटील यांच्या स्वागताचा होता की गाला यांच्या वाढदिवसाचा यावर आता चौकशी सुरू आहे. 

सहायक पोलिस आयुक्त संजयकुमार पाटील यांनी याबाबत अधिकृत माहिती देण्यास नकार दिला. पुढील दोन दिवसात अहवाल आल्यानंतर दोषी आढळल्यास कारवाई केली जाईल, असे सांगितले.