मलंगगड लोडशेडिंग : शिवसेनेने अधीक्षक अभियंत्यांच्या दालनात पेटवल्या मेणबत्या

कल्याण : कल्याण जवळील मलंगगड परिसरात गेल्या काही दिवसांपासून रात्रीच्या वेळी अघोषित लोडशेडिंग सुरू करण्यात आलं आहे. याविरोधात आज शिवसेनेनं कल्याणच्या तेजश्री या महावितरण कार्यालयावर मोर्चा काढला होता. शिवसेनेच्या नेतृत्त्वात निघालेल्या या मोर्चात मलंगगड परिसरातील शेकडो ग्रामस्थ सहभागी झाले होते. तर महिलांनीही मोर्चात उत्स्फूर्तपणे सहभाग घेतला.

शिवसेनेचे स्थानिक नेते आणि माजी नगरसेवक महेश गायकवाड, चैनू जाधव, राहुल पाटील, युवराज पाटील यांच्या नेतृत्वात हा मोर्चा काढण्यात आला. यानंतर महावितरणचे अधीक्षक अभियंता दीपक पाटील यांची शिवसेनेच्या शिष्टमंडळाने भेट घेतली. मात्र, यावेळी पाटील यांच्या दालनातील लाईट, एसी, पंखे बंद करून त्यांच्याशी अंधारात चर्चा करण्यात आली.

तसेच त्यांना लोडशेडिंगच्या परिस्थितीची जाणीव करून देण्यासाठी त्यांच्या दालनात शिवसेनेनं मेणबत्त्या पेटवत लोडशेडिंगचा प्रतिकात्मक निषेध केला. यानंतर जर रात्रीची अघोषित लोडशेडिंग बंद झाली नाही, तर याहीपेक्षा तीव्र आंदोलन करू, असा इशारा  महेश गायकवाड यांनी दिला. तर लोडशेडिंग बंद न झाल्यास महावितरणच्या सर्व अधिकाऱ्यांना एक रात्र मलंगगड भागात मुक्कामाला घेऊन जाऊ, असा इशारा चैनू जाधव यांनी दिला.दरम्यान सत्ताधारी शिवसेनेनेच मोर्चा काढल्याने अनेकांच्या भुवया उंचावल्या आहेत.