पुण्याचे अधिक्षक संदीप पाटलांनी केले तीन पोलिस बडतर्फ

बारामती:आरोपींना गुन्हा दाखल झाल्याची माहिती देणे तसेच फिर्यादीवर दबाव आणून प्रतिज्ञापत्रकावर सह्या घेतल्याबद्दल तीन पोलिस कर्मचा-यांना जिल्हा पोलिस अधीक्षक संदीप पाटील यांनी बडतर्फ केले आहे.  अभिजीत एकशिंगे (नेमणूक भिगवण पोलिस ठाणे), तात्या विनायक खाडे व भगवान उत्तम थोरवे ( दोघेही नेमणूक- बारामती शहर पोलिस ठाणे) या तिघांना पोलिस अधीक्षकांनी बडतर्फ केले आहे. 

पोपट तुकाराम थोरवे (रा. म्हसोबावाडी, ता. पुरंदर जि पुणे) यांनी त्यांना झालेल्या मारहाणीविरुध्द भिगवण पोलिस ठाण्यात मारहाणीचा गुन्हा दाखल केला होता. सदर गुन्हा दाखल झाल्याची माहिती पोलिस कर्मचारी अभिजीत एकशिंगे यांनी त्यांच्या मोबाईलवरुन संबंधित आरोपींना दिली असे निष्पन्न झाले आहे. या गुन्ह्यातील मुख्य आरोपी हा रेकॉर्डवरील गुन्हेगार असून त्याच्याविरुध्द गंभीर गुन्हे दाखल आहेत व पोलिस त्याचा शोध घेत आहेत याची माहिती असूनही  एकशिंगे यांनी त्याच्याशी झालेल्या संभाषणाची माहिती प्रभारी अधिका-यांना दिली नाही. 

हे देखिल वाचा - स्थूल पोलिसांसाठी रत्नागिरी पोलिस अधिक्षकांनी सुरु केल रिफ्रेशर कोर्स

गुन्हा दाखल झाल्याची माहिती आरोपींना नव्हती, मात्र एकशिंगे यांच्या फोननंतर आरोपी निघून गेले. त्या मुळे या गुन्ह्यात त्यांना अटक करता आली नसल्याचा ठपका एकशिंगे यांच्यावर ठेवण्यात आला आहे. 

दरम्यान याच प्रकरणात बारामती शहर पोलिस ठाण्यात नेमणुकीस असलेले तात्या विनायक खाडे व भगवान उत्तम थोरवे यांनी आरोपींशी आर्थिक सलगी करुन पोपट तुकाराम थोरवे या फिर्यादीवर दबाव आणून  न्यायालयात प्रतिज्ञापत्रकावर सह्या करण्यास भाग पाडल्याचा ठपका या दोघांवर ठेवण्यात आला आहे. त्यांचे कृत्य घृणास्पद व विकृत असून पोलिस दलाच्या सचोटीस न शोभणारे व शिस्तीस बाधा असल्याचे नमूद करत पोलिस अधीक्षकांनी या तिघांना बडतर्फ केले आहे.