शरद पवारांच्या सभेमुळे बाबासाहेब पाटलांना मिळाले बळ

अहमदपूर :  एकीकडे बंडखोरीने ग्रासलेली भाजप आणि दुसरकीडे राष्ट्रवादीचे अध्यक्ष शरद पवार यांची झालेली प्रचंड जाहीर सभा यामुळे राष्ट्रवादी-कॉंग्रेस महाआघाडीचे बाबासाहेब पाटील यांना बळ मिळाल्याची चर्चा सध्या मतदारसंघात सुरू आहे.

अहमदपूर-चाकूर विधानसभा मतदारसंघात चौरंगी लढतीचे चित्र आहे. यात भाजपचे बंडखोर अपक्ष उमेदवार दिलिपराव देशमुख, मुळ भाजप पण आता वंचित बहुजन आघाडीच्या उमेदवार अयोध्या केंद्रे यांचा समावेश आहे.

भाजपमधून आपल्यालाच उमेदवारी मिळावी यासाठी एकुण आठजण उत्सुक होते. त्यामुळे भाजपमध्ये बंडखोरी होणार याची राजकीय वर्तुळात चर्चा होती आणि अपेक्षेप्रमाणे घडलेही तसेच.

भाजप मधील बंडखोरी आणि बेदिली आघाडीचे उमेदवार बाबासाहेब पाटील यांच्या पथ्यावर पडण्याची शक्‍यता आहे. याशिवाय शरद पवार यांची मतदारसंघात झालेली सभा बाबासाहेब पाटील यांच्यासाठी महत्वाची ठरणार आहे.

पवार यांनी सभेत युती शासनाचे वाभाडे तर काढलेच, पण बाबासाहेब पाटील यांच्या मतदारसंघातील कामाची आणि त्यांच्या दूरदृष्टीचे जाहीर कौतुकही केले. एकुणच या सभेचा सकारात्मक परिणाम होईल आणि बाबासाहेब पाटील यांना बळ मिळेल असे दिसते.