कोणाशीही युती करुन महादेव जानकरांना दिल्ली गाठायचीय

बीड : आपण कोणाशीही युती करु पण दिल्लीला जाऊच अशी इच्छा राज्याचे माजी मंत्री आणि राष्ट्रीय समाज पक्षाचे अध्यक्ष महादेव जानकर यांनी बोलून दाखविली. महायुती सरकारच्या काळात त्यांना पशुसंवर्धन, दुग्धविकास, मत्स अशा विविध खात्यांचे मंत्रीपद मिळाले होते.

तसे लोकनेते गोपीनाथराव मुंडे यांचे निकटवर्तीय मानले जाणारे महादेव जानकर मुंडेंमुळेच महायुतीमध्ये आले होते. योगायोगाने राज्यात सरकार आल्यानंतर तत्कानि महायुतीमधील रासपला महादेव जानकर यांच्या माध्यमातून राज्यात कॅबीनेट मंत्रीपदासह त्यांच्या समर्थकांना महामंडळांवरही स्थान मिळाले. यावेळी वेगळीच चक्रे फिरली आणि महायुती ऐवजी महाविकास आघाडीचे सरकार आले. त्यामुळे राज्यात प्रतिनिधित्व केलेल्या महादेव जानकर यांचे राज्यात मन रमत नसल्याचे दिसत आहे. 

रविवारी बीडला एका पुरस्कार वितरण समारंभाला आलेल्या जानकरांनीच ही इच्छा बोलून दाखविली. आपल्या इच्छाशक्तीच्या जोरावर विविध क्षेत्रांत यश संपादन करा, असा सल्ला देत आपली दिल्लीला जाण्याची इच्छा अजून अधुरी असल्याची खंत त्यांनी बोलून दाखवितानाच ही इच्छा पुरी करण्यासाठी 'कोणाशीही युती करेन, ती कशी करेन, हे सांगणार नाही; पण एकदा दिल्लीला जाणारच' असे ते म्हणाले.