#CoronaLockDownफोनवरूनच मतदार संघातील कामे सुरु : आमदार डॉ.राहूल पाटील

परभणी : ''कोरोना विषाणूचा प्रादुर्भाव रोखण्यासाठी केंद्र सरकार व राज्य सरकार ज्या उपाययोजना सांगत आहेत. त्याची आपण सर्वांनी कडक अंमलबजावणी केली पाहिजे. मी ही सध्या माझ्या कुटूंबासोबत वेळ घालवत आहे. ऐतिहासिक पुस्तकांचे वाचन सुरु आहे. मतदार संघातील कामे देखील फोनवरूनच करत आहे,'' असे परभणीचे आमदार डॉ. राहुल पाटील यांनी सांगितले.

कोरोना विषाणूचा प्रादुर्भाव रोखण्यासाठी सर्वस्तरावर प्रयत्न सुरु आहेत. यात राजकीय पुढारी देखी मागे नाहीत. परभणीचे शिवसेनेचे आमदार डॉ. राहुल पाटील यांचा दरबार 24 तास गजबजलेला असतो. परंतु, या दिवसात तो पूर्णत: निर्मनुष्य राहील याची काळजी स्वतः आमदार डॉ. पाटील यांनीच घेतली आहे. तशा सुचनाच त्यांच्या कार्यालयातील कर्मचाऱ्यांना देण्यात आल्या आहेत. काय कामे असतील ती फोनवरच करावीत असे आदेशही त्यांनी दिले आहेत. असे असतांना लोकांशी सतत संपर्कात राहणे आमदार डॉ. राहुल पाटील यांनी सध्या घरात राहूनच मतदार संघातील कारभार पाहणे पसंत केले आहे. 

''मतदार संघातील महत्वाची कामे देखील ते फोनद्वारेच पूर्ण करत आहेत. एरवी माणसाच्या गरड्यात राहणारा नेत्या घरी बसून काय करतो असे विचारल्यानंतर त्यांनी सांगितले की मी सध्या माझी पत्नी डॉ.संप्रिया व दोन मुली यांच्या सहवासात दिवस घालवित आहे. त्यांनाही मी जास्तवेळ सोबत राहत असल्याने आनंद होत आहे. परंतु, या परिस्थितीत मतदार संघातील लोकांना कसे सोडणार म्हणून त्यांची कामे देखील मी फोनवरूनच सोडविण्याचा प्रयत्न करत आहे,'' असे ते म्हणाले.

आपण काही दिवस घरात बसून राहिलो तर नक्कीच आपण हा लढा जिंकू असा विश्वास व्यक्त करून  लोकांनी देखील विनाकारण घराबाहेर फिरणे टाळावे, कुणाशी संभाषण करण्याची वेळच आली असेल तर 1 मीटर दुरूनच बोलावे. शासन व प्रशासनाच्या सुचनाचे काटेकोरपणे पालन करावे, असे आवाहनही आमदार डॉ. राहुल पाटील यांनी केले आहे.