रावसाहेब दानवे यांच्याकडूनही कोरोनाग्रस्ताना एक कोटी, एक लाख रुपये

औरंगाबाद : भाजपचे खासदार तथा केंद्रीय राज्यमंत्री रावसाहेब दानवे यांनी आपल्या खासदार निधीमधून एक कोटी रुपये व एक महिन्याचे मानधन असे एक कोटी एक लाख रुपये कोरोनाग्रस्तांच्या मदतीसाठी पंतप्रधान सहाय्यता निधी देऊ केले आहेत.या संदर्भातील पत्र त्यांनी संबंधित खात्याला पाठवले असून हा निधी वर्ग करण्यास सांगितले आहे.  देशावर कोरोनाचे मोठे संकट ओढवलेले आहे . केंद्र व राज्य सरकार कोरोनाशी लढा देण्यासाठी अनेक उपाययोजना करत असताना लोकप्रतिनिधीही मदतीसाठी पुढे सरसावले आहेत.

आमदार, जिल्हा परिषद अध्यक्ष, सदस्य, ग्रामसेवक, नगरसेवक यांनी आपापल्या परीने वैयक्तिक व आपल्याला मिळणाऱ्या मानधनातून केंद्र व राज्य सरकारच्या सहाय्यता निधीमध्ये योगदान दिले आहे . नांदेडचे भाजप खासदार प्रताप पाटील चिखलीकर यांनी कोरोनाग्रस्तांच्या मदतीसाठी आपल्या खासदार निधीतून एक कोटी रुपये देण्याचे जाहीर केले. त्यानंतर आता केंद्रीय राज्यमंत्री रावसाहेब दानवे यांनी देखील खासदार निधीतून एक कोटी आणि एक महिन्याचे मानधन एक लाख रुपये पंतप्रधान सहाय्यता निधी देण्याचे घोषित केले.