नवीन आमदारांना कामाची घाई !

बीड : दिग्गज काका जयदत्त क्षीरसागर यांचा पराभव करुन जायंट किलर ठरलेल्या संदीप क्षीरसागर यांच्या शिरावर आता जबाबदाऱ्याही वाढल्या आहेत. वाढत्या जबाबदाऱ्या लक्षात घेऊन त्यांनीही आमदार झाल्याच्या दुसऱ्या दिवशी शेतकरी व गरिबांचा मुद्दा हातात घेऊन प्रशासला कामाला लावले आहे.

आमदार करताना संदीप क्षीरसागर यांच्याकडून तरुण, शेतकरी, व्यापारी, गरिब अशा विविध घटकांच्या अनेक अपेक्षा आहेत. सहाजिकच त्यांनाही त्याची जाण आहे. म्हणून गुरुवारी आमदार झालेल्या संदीप क्षीरसागर यांनी शुक्रवारी लगेच शेतकऱ्यांचा प्रश्न हातात घेतला.

मागचे दिड वर्षे दुष्काळाच्या झळा सोसणाऱ्या शेतकऱ्यांना आता परतीच्या पावसाने नाकी नऊ आणले आहेत. मागचे आठ दिवस सलग पाऊस पडत असल्याने कपाशी, सोयाबीन, बाजरी पिकांचे मोठे नुकसान झाले आहे. या पिकांचे पंचनामे करण्याच्या सुचना त्यांनी तहसिलदारांना दिल्या.

तर, दिवाळी तोंडावर असल्याने गरिबांना रेशन मिळाले पाहीजे. ग्रामीण भागात व शहरात एकही लाभार्थी रेशनपासून वंचित राहणार नाही असेही त्यांनी तहसिलदारांना सांगीतले आहे.