काँग्रेसच्या माजी मुख्यमंत्र्यांचा नवीन पक्ष अन् दुसऱ्याच दिवशी शहांच्या भेटीचा योग

नवी दिल्ली : पंजाबच्या (Punjab) मुख्यमंत्री (Chief Minister) पदावरून हटवल्यानंतर कॅप्टन अमरिंदरसिंग (Amarinder Singh) यांनी काँग्रेस (Congress) विरोधात आक्रमक पवित्रा घेतला आहे. त्यांनी स्वतंत्र पक्ष स्थापन करण्याची घोषणा आज केली. यामुळे पंजाबमधील राजकीय वातावरण तापले आहे. पुढील वर्षी राज्यात होणाऱ्या विधानसभा निवडणुकीत त्यांचा पक्ष स्वतंत्रपणे मैदानात उतरणार आहे. आता कॅप्टन हे उद्या केंद्रीय गृहमंत्री अमित शहा यांची भेट घेणार असल्याने सगळ्यांचा भुवया उंचावल्या आहेत.

पक्षाच्या स्थापनेची घोषणा करताना कॅप्टन अमरिंदरसिंग म्हणाले की, आमच्यासोबत अनेक काँग्रेस नेते आहेत. पक्षाची स्थापना झाल्यानंतर या नेत्यांची नावे आम्ही जाहीर करू. पंजाबमधील सर्वच्या सर्व 117 जागा आमचा पक्ष लढवेल. आम्ही स्वबळावर लढणार की आघाडी करणार याचे उत्तर तुम्हाला आगामी काळात मिळेल. पक्षाच्या नावाची घोषणा लवकरच होईल. कारण आमचे वकील निवडणूक आयोगासोबत या संदर्भात चर्चा करीत आहेत.

अमित शहांची उद्या भेट घेणार असल्याचे कॅप्टन यांनी या वेळी सांगितले. ते म्हणाले की, उद्या आम्ही 25 ते 30 जणांना घेऊन दिल्लीला जाणार आहोत. आम्ही शेतकऱ्यांच्या मुद्द्यावर अमित शहांशी चर्चा करणार आहोत. केंद्र सरकारने आणलेल्या तीन कृषी कायद्यांवर काय तोडगा निघेल, याबाबत आताच सांगता येणार नाही. याबाबत मी त्यांना माझे मत मागील बैठकीतच सांगितले होते.

भाजपसोबत आघाडी करण्याच्या मुद्द्यावर ते म्हणाले की, आमचा पक्ष जागावाटपाच्या संदर्भात प्रस्ताव आल्यास विचार करेल. परंतु, आम्ही भाजपसोबत जाणार आहोत, असे आम्ही कधीच म्हटले नव्हते. मी फक्त म्हटले होते की मी आणि माझा पक्ष जागावाटपाबाबत चर्चा करीत आहोत. अद्याप आघाडी करण्याविषयी कोणतीही चर्चा राजकीय पक्षांशी झालेली नाही.

कॅप्टन यांच्या पक्षस्थापनेच्या हालचालींना पंजाबचे राजकारण ढवळून निघाले आहे. त्यांनी अकाली दलाचे विविध गटांना सोबत घेण्यासाठी पावले उचलली आहेत. असे असले तरी सर्वच राजकीय पक्ष याबाबत सावध प्रतिक्रिया देत आहेत. पुढील वर्षाच्या सुरवातीला पंजाबमध्ये विधानसभा निवडणुका होत आहेत. यामुळे आतापासूनच सर्वच पक्षांकडून जोरदार मोर्चेबांधणी सुरू झाली आहे. कॅप्टन यांच्याकडे भाजपनेही मैत्रीचा हात पुढे केला आहे.