आसाम हिंसाचारात दोघांचा मृत्यू; नऊ पोलिस जखमी

गुवाहाटी : आसाममध्ये (Assam) दरांग जिल्ह्यात (Darang District) अतिक्रमणे हटविताना पोलिस आणि स्थानिक नागरिक यांच्यात झालेल्या हिंसक संघर्षात (Violent conflict) दोन नागरिकांचा मृत्यू झाला, तर नऊ पोलिस कर्मचारी जखमी झाले. या घटनेमुळे तणावाचे वातावरण निर्माण झाले असून आसाम सरकारने घटनेच्या न्यायालयीन तपासाचे आदेश दिले आहेत.

आसाम सरकारने (Assam Government) दरांग जिल्ह्यात ढोलपूर गोरुखुटी गावात अतिक्रमण विरोधी मोहिम सुरु केली आहे. सरकारने आतापर्यंत सुमारे आठशे कुटुंबांना हलविले आहे. सरकारला ही जागा एका कृषी प्रकल्पासाठी हवी असून हे सर्व लोक अतिक्रमण करून रहात होते, असा आसाम सरकारचा दावा आहे. या भागात स्थलांतरीत मुस्लिमांची वस्ती अधिक प्रमाणात होती, असे स्थानिक लोकांचे म्हणणे आहे. आज अतिक्रमण हटविण्याची मोहिम सुरु असताना जमावाने हल्ला केल्याने शस्त्रबळाचा वापर करावा लागला, असा दावा पोलिसांनी केला आहे.

आंदोलकांच्या दिशेने पोलिस गोळीबार करत असल्याचे चित्रीकरण अनेक वाहिन्यांवर दिसत होते. घटनास्थळी असलेला एक छायाचित्रकारही पोलिसांच्या मारहाणीनंतर निश्‍चेष्ट पडलेल्या एका आंदोलकाला मारहाण करत असल्याचे दृश्‍यही कॅमेरामध्ये बंदिस्त झाले. या प्रकारावर टीका झाल्यानंतर सरकारने घटनेच्या न्यायालयीन चौकशीचे आदेश दिले आहेत. परिस्थिती आता नियंत्रणात असल्याचे पोलिस अधिक्षक सुशांत बिस्व सरमा यांनी सांगितले.

दरम्यान या हिंसाचाराच्या घटनेवर काँग्रेस नेते राहूल गांधी यांनी आपली भुमिका स्पष्ट केली आहे. ''आसाममध्ये राज्यपुरस्कृत संघर्ष सुरु आहे. मी राज्यातील जनतेच्या बाजूने उभा आहे.'' असं राहुल गांधी यांनी म्हटलं आहे.