भाजपकडून गाजावाजा करीत मुलायमसिंहांच्या सूनबाईंना प्रवेश पण ऐनवेळी पत्ता कट

लखनौ : विधानसभा निवडणुकीच्या (UP Election 2022) तोंडावर उत्तर प्रदेशातील राजकारणात मोठ्या घडामोडी घडत आहे. भाजपने अखिलेश यादव (Akhilesh Yadav) यांना त्यांच्या घरातूनच धक्का दिला होता. माजी मुख्यमंत्री मुलायमसिंह यादव यांच्या सूनबाई अपर्णा यादव (Aparna Yadav) यांनी भाजपमध्ये प्रवेश केला होता. आता भाजपने अपर्णा यादव यांचे तिकीट कापून त्यांनाच धक्का दिला आहे.

भाजपने लखनौमधील हायप्रोफाईल अशा नऊ विधानसभा मतदारसंघातील उमेदवारांची यादी बराच खल झाल्यानंतर जाहीर केली. मागील वेळी लखनौमधील नऊपैकी आठ मतदारसंघ भाजपने जिंकले होते. अपर्णा यादव या लखनौ कॅन्टोन्मेंटमधून इच्छुक होत्या. पण त्यांचे तिकीट कापण्यात आले आहे. त्यांच्या जागी विद्यमान मंत्री ब्रजेश पाठक यांना उमेदवारी देण्यात आली आहे. मागील निवडणुकीत अपर्णा यादव या लखनौ कॅन्टोन्मेंटमधून पराभूत झाल्या होत्या. हा भाजपचा अतिशय सुरक्षित मतदारसंघ मानला जातो. भाजपने अपर्णा यांना तेथून उमेदवारी न देता धक्का दिला आहे. त्यांचे आगामी काळात पुनर्वसन केले जाते का, हे पाहावे लागणार आहे.

अपर्णा यादव यांनी 2017 मध्ये विधानसभेची निवडणूक लढवली होती. लखनौ कॅन्टोन्मेंटमधून त्या मैदानात उतरल्या होत्या. काँग्रेसच्या रिटा बहुगुणा जोशी यांनी त्यांचा पराभव केला होता. आता याच रिटा बहुगुणा भाजपमध्ये आहेत. अपर्णा यादव यांचा राजकीय प्रभाव फारसा नसला तरी त्या समाजकारणात खूप आधीपासून सक्रिय आहेत. त्या 'बीअवेअर' नावाची सामाजिक संस्था चालवतात. ही संस्था निराधार महिलांसाठी काम करते. याचबरोबर ही संस्था लखनौमध्ये गोशाळा चालवते.

मागील विधानसभा निवडणुकीत पराभव झाल्याने अपर्णा यांची राजकीय इनिंग सुरूच झाली नव्हती. आता त्या थेट भाजपमध्ये दाखल झाल्या आहेत. पुन्हा एकदा त्या राजकीय इनिंग सुरू करण्याच्या तयारीत त्या होत्या. राज्यात भाजप विरुद्ध समाजवादी पक्ष अशी थेट लढत असताना अपर्णा यांच्या पक्षांतरामुळे खळबळ उडाली होती. अखिलेश यादव यावर काय भूमिका घेतात आणि अपर्णा यांची राजकीय इनिंग यशस्वी ठरते की नाही, याकडे लक्ष लागले होते. आता त्यांची इनिंग पुन्हा सुरू झाली नसल्याचे दिसत आहे.

मुलायमसिंह यांच्याऐवजी आता त्यांचे पुत्र व माजी मुख्यमंत्री अखिलेश यादव हे समाजवादी पक्षाची (Samajwadi Party) धुरा सांभाळत आहेत. मुलायमसिंह यांचे दुसरे पुत्र प्रतिक यांच्या अपर्णा या पत्नी आहेत. त्यांनी गेल्या महिन्यात मुख्यमंत्री योगी आदित्यनाथ यांचे कौतुक केले होते. तेव्हाच अनेकांच्या भुवया उंचावल्या होत्या. मात्र, त्यानंतर परत मुलायमसिंह आणि अखिलेश यांची स्तुती करून अपर्णा यांनी कुटुंबासोबतच असल्याचे दाखवले होते.

अपर्णा यांनी सगळ्यांनाच धक्का देत आज भाजपमध्ये (BJP) प्रवेश केला होता. उपमुख्यमंत्री केशवप्रसाद मौर्य आणि भाजपचे प्रदेशाध्यक्ष स्वतंत्रदेवसिंह यांच्या उपस्थितीत हा प्रवेश झाला. मागील काही दिवसांत समाजवादी पक्षाने भाजपचे तीन मंत्री आणि आठ आमदार फोडल्याने प्रत्युत्तर देण्याची भाजपने तयारी चालवली होती. अखिलेश यांच्या भावाच्या पत्नीला फोडून भाजपने मोठा धक्का दिला होता. अपर्णा यांनी लखनौ कॅन्टोन्मेंटमधून उमेदवारी मिळण्याची शक्यता होती. (Aparna Yadav denied ticket by BJP)