मोठी बातमी : भाजपकडून एकाला डच्चू काही तासांतच दुसरा मुख्यमंत्री

आगरतळा : त्रिपुराचे मुख्यमंत्री विप्लवकुमार देव (Biplab Kumar Deb) यांनी तडकाफडकी राजीनामा आज दिला. भाजपने (BJP) मुदत संपण्याआधीच देव यांना पदावरून हटवलं. यानंतर काही तासांतच भाजपनं नवीन मुख्यमंत्र्यांची निवड केली आहे. डॉ.माणिक साहा यांच्या गळ्यात मुख्यमंत्रिपदाची माळ पडली आहे. विशेष म्हणजे नवीन मुख्यमंत्री निवडीसाठी महाराष्ट्रातील नेते विनोद तावडे (Vinod Tawde) यांच्यावर केंद्रीय निरीक्षक म्हणून जबाबदारी सोपवण्यात आली होती.

त्रिपुरात सत्तेत आल्यानंतर देव यांच्या खांद्यावर मुख्यमंत्रिपदाची जबाबदारी सोपवण्यात आली होती. आज त्यांनी तडकाफडकी मुख्यमंत्रिपदाचा राजीनामा दिला. नवीन मुख्यमंत्री निवडण्यासाठी केंद्रीय निरीक्षक म्हणून विनोद तावडे आणि भूपेंद्रकुमार यादव राज्यात दाखल झाले. यानंतर पक्षाच्या आमदारांची बैठक झाली. या बैठकीत नवीन मुख्यमंत्र्यांची निवड करण्यात आली. मुख्यमंत्री म्हणून डॉ. माणिक साहा यांच्या नावावर या बैठकीत शिक्कामोर्तब झालं. आगामी विधानसभा निवडणूक डोळ्यासमोर पक्षाने हा निर्णय घेतल्याचे मानले जात आहे. साहा हे भाजपचे प्रदेशाध्यक्ष असून, राज्यसभेचे सदस्य आहेत.

त्रिपुरात पुढील वर्षी विधानसभेची निवडणूक (Assembly Election) होत आहे. निवडणुकीला सुमारे वर्षभराचा कालावधी असतानाच मुख्यमंत्रिपदावरून देव यांना हटवण्यात आलं. राज्यातील भाजपमध्ये गटबाजी उफाळून आल्यानं पक्ष नेतृत्वानं हे पाऊल उचललं आहे. विशेष म्हणजे दोनच दिवसांपूर्वी देव यांना दिल्लीला पाचारण करण्यात आलं होतं. त्यावेळी केंद्रीय गृहमंत्री अमित शहा आणि भाजपचे राष्ट्रीय अध्यक्ष जे.पी.नड्डा यांच्याशी त्यांनी चर्चा केली होती. त्याचवेळी देव यांच्या राजीनाम्यावर शिक्कामोर्तब झालं होतं.

देव यांनी राज्यपाल एस.एन.आर्य यांच्याकडे मुख्यमंत्रिपदाचा राजीनामा सोपवला आहे. राजीनामा दिल्यानंतर बोलताना त्यांनी पक्षाने संघटनेची ताकद वाढवण्याची जबाबदारी दिल्याचं सांगितलं. दरम्यान, काही दिवसांपूर्वी त्रिपुराचे (Tripura) माजी आरोग्य मंत्री सुदीप रॉय बर्मन आणि आशिष कुमार साहा यांनी आमदारकीचा राजीनामा देत भाजपलाही रामराम ठोकला होता. त्यानंतर दोघांनीही काँग्रेसमध्ये प्रवेश केला होता. यामुळं भाजपला लागलेली गळतीही नेतृत्वासाठी डोकेदुखी ठरली होती. आता गटबाजी रोखण्यासाठी मुख्यमंत्री बदलाचा निर्णय अखेर घेण्यात आला.