भाजपला धक्का; सकाळी आमदारकीचा राजीनामा अन् आता पक्षालाही केला रामराम

पणजी : विधानसभा निवडणुकीच्या (Assembly Election) पार्श्वभूमीवर गोव्यातील राजकारण चांगलंच तापलं आहे. या धामधुमीत भाजपला चोवीस तासात दोन मोठे धक्के बसले आहेत. कॅबिनेट मंत्र्याने बुधवारी रात्री पदाचा राजीनामा दिल्यानंतर आता एका आमदारानेही पक्षाला रामराम ठोकला आहे.

गोव्याचे (Goa) नगर विकास मंत्री आणि भाजपचे (BJP) आमदार मिलिंद नाईक (Milind Naik) यांनी बुधवारी रात्री उशिरा मंत्रिपदाचा राजीनामा दिला आहे. त्यांच्या सेक्स स्कँडलमध्ये (Sex Scandle) सहभागी असल्याचा गंभीर आरोप काँग्रेसने (Congress) केला होता. त्यानंतर गुरुवारी सकाळी अलीना सलडान्हा (Alina Saldanha) यांनी आमदारकीचा राजीनामा दिला होता. त्यानंतर त्या कोणत्या पक्षात प्रवेश करणार, याबाबत राजकीय चर्चांना उधाण आलं होतं. अलीना यांनी त्यांच्या पती मथानी सलडान्हा यांच्या निधनानंतर भाजपमध्ये प्रवेश केला होता.

अखेर अलीना यांनी आम आदमी पक्षाला पसंती दिली आहे. दिल्लीचे मुख्यमंत्री अरविंद केजरीवाल (Arvind Kejariwal) यांच्या उपस्थितीत त्यांनी आमदारकीच्या राजीनाम्यानंतर काही तासांतच आपमध्ये प्रवेश केला आहे. केजरीवाल यांनीच ट्विट करून ही माहिती दिली आहे. निवडणुकीच्या तोंडावर भाजपमधून बाहेर पडलेल्या त्या पहिल्या आमदार ठरल्या आहेत. तसेच त्यांच्या प्रवेशाने आपची ताकदही वाढली आहे.

राजीनामा देताना सलडान्हा म्हणाल्या होत्या की, भाजपमध्ये दिवंगत मथानी सलडान्हा हे आले होते. त्यांच्या निधनानंतर त्या जागेवर मी राजकारणात प्रवेश केला होता. पण आता भाजप हा पक्ष पूर्वीसारखा राहिलेला नाही. आपल्या सर्व तत्वांना पक्ष विसरला असल्यासारखे वाटते, असे सलडान्हा म्हणाल्या. सलडान्हा यांनी अद्याप भाजपला सोडचिठ्ठी दिली नसली तरी त्या याबाबत लवकरच निर्णय घेण्याची शक्यता आहे.

दरम्यान, मुख्यमंत्री कार्यालयाने बुधवारी रात्री उशिरा एक निवेदन प्रसिध्द करत नाईक यांच्या राजीनाम्याबाबत स्पष्ट केलं आहे. नाईक यांनी मुक्त आणि कोणत्याही दबावाशिवाय चौकशी व्हावी, यासाठी राजीनामा दिल्याचे निवेदनात म्हटले आहे. कार्यालयाने याबाबत केलेल्या ट्विटमध्ये म्हटले आहे की, नाईक यांनी मंत्रिपदाचा राजीनामा दिला असून तो स्वीकारण्यात आला आहे. त्यांचा राजीनामा राज्यपालांकडे पाठवण्यात आला आहे.

नाईक हे दक्षिण गोव्यातील मोरमुगावो मतदारसंघाचे प्रतिनिधित्व करतात. त्यांच्याकडे मुख्यमंत्री प्रमोद सावंत (Pramod Sawant) यांच्या मंत्रिमंडळात नगर विकास हे महत्वाचे खाते होते. दिवंगत मनोहर पर्रीकर (Manohar Parikar) यांच्या मंत्रिमंडळातही त्यांचा समावेश होता. काही दिवसांपूर्वी काँग्रेसचे गोवा प्रदेशाध्यक्ष गिरीश चोडणकर (Girish Chodankar) यांनी नाईक यांच्यावर सेक्स स्कँडलचे आरोप केले होते. मंत्रिपदाचा गैरवापर करून ते महिलांचे लैंगिक शोषण करत असल्याचा आरोप करत त्यांनी राजीनाम्याची मागणी केली होती.