भाजपची पहिली यादी जाहीर : नंदिग्राममध्ये ममतादीदींच्या विरोधात सुवेंदू अधिकारी

कोलकता : पश्चिम बंगालमध्ये आगामी विधानसभा निवडणुकीमुळे राजकीय वातावरण तापले आहे. भाजपने बंगालमध्ये उमेदवारांची पहिली यादी आज जाहीर केली. यात 57 जणांचा समावेश आहे. या यादीतील सर्वाधिक चर्चेतील नाव सुवेंदू अधिकारींचे आहे. मुख्यमंत्री ममता बॅनर्जींचे एकेकाळची विश्वासू सहकारी असलेले सुवेंदू आता त्यांच्याच विरोधात नंदिग्राममधून मैदानात उतरले आहेत.  

तृणमूल काँग्रेसच्या प्रमुख व मुख्यमंत्री ममता बॅनर्जी यांनी आगामी निवडणूक नंदिग्राममधून लढणार असल्याचे काल (ता.5) जाहीर केले होते. याचवेळी पारंपरिक भवानीपूर मतदारसंघ त्यांनी सोडला आहे. नंदिग्राममधूनच दहा वर्षांपूर्वी डाव्यांच्या बालेकिल्ल्याला सुरूंग लावत ममतांनी सत्तांतर घडवले होते. आता या मतदारसंघातून निवडणूक लढवत त्यांनी भाजपलाही सुरूंग लावण्याची तयारी केल्याची चर्चा होती. आता भाजपने 52 उमेदवारांचा समावेश असलेली पहिली यादी जाहीर केली आहे. यातून सुवेंदू अधिकारी हे नंदिग्राममधून लढतील, हे स्पष्ट झाले आहे. 

ममता बॅनर्जी यांनी पश्चिम बंगालमधील निवडणूकीसाठी उमेदवारांची यादी जाहीर केली. राज्यातील 294 पैकी 291 जागांवर तृणमूलचे उमेदवार असतील तर, तीन जागा गोरखा जनमुक्ती मोर्चाला देण्यात आल्या आहेत. या यादीत 50 महिला व 42 मुस्लिम उमेदवारांचा समावेश आहे. सध्या आमदार असलेल्या 23 ते 24 जणांना वय आणि इतर कारणांमुळे उमेदवारी नाकारण्यात आले असल्याचे ममता यांनी जाहीर केले. तसेच, त्या नंदिग्राम मतदारसंघातून निवडणूक लढविणार असल्याचेही जाहीर केले. 

ममतांनी आज नंदिग्राममधून लढण्याची तयारी मागील काही दिवसांपासूनच सुरू केली होती. त्यांनी अधिकृतपणे घोषणा करत त्यावर शिक्कामोर्तब केले. नंदिग्राम हा तृणमूल सोडून भाजपमध्ये गेलेले सुवेंदू अधिकारी यांचा बालेकिल्ला म्हणून ओळखला जातो. नंदिग्रामवर अधिकारी कुटुंबीयांचे वर्चस्व आहे. कधीकाळी तृणमूल काँग्रेसचे निष्ठावंत अशी त्यांची ओळख होती पण सुवेंदू यांनी बंडाचा झेंडा रोवत भाजपशी हातमिळवणी केली आहे. त्यानंतर येथील राजकीय समीकरणे बदलली आहेत. आता नंदिग्राम हा मतदारसंघ तृणमूल व भाजपच्या दृष्टीने प्रतिष्ठेचा ठरणार आहे. दोन्ही नेते मातब्बर असल्याने विजयासाठी जोरदार प्रयत्न केले जातील.

ममतादीदींनी जाणीवपूर्वक या मतदारसंघाची निवड केली आहे. राज्यामध्ये 2007 मध्ये डाव्यांची सत्ता असताना नंदिग्राममधील रसायन कारखान्याविरोधात शेतकरी आंदोलनाचा भडका उडाला होता. या आंदोलनानंतर 2011 मध्ये डाव्या आघाडीच्या ३४ वर्षांच्या सत्तेला सुरूंग लागून सत्तांतर झाले होते. त्यावेळी ममतांच्या विजयात नंदिग्रामचे महत्व अनन्यसाधारण होते. ममतांचे नंदिग्रामशी भावनिक नातेही आहे. येथे पोलिसांनी केलेल्या गोळीबारात 14 लोक ठार झाले होते तेव्हा सर्वप्रथम घटनास्थळी पोचणाऱ्यांमध्ये त्यांचा समावेश होता. 

Edited by Sanjay Jadhav