काळजी नको : प्राप्तिकर विवरणपत्र भरण्याची मुदत 31 डिसेंबरपर्यंत

नवी दिल्ली : कोरोना महामारीमुळे प्राप्तीकर विवरणपत्र (आयटीआर) भरण्याची मुदत या कॅलेंडर वर्षाअखेरपर्यंत पुन्हा वाढविण्याची घोषणा आज दुपारी करण्यात आली. यानुसार आता प्राप्तीकर भरण्याची अंतिम मुदत 31 डिसेंबर 2020 ही असेल.

कोरोना महामारीमुळे देशाच्या अर्थव्यवस्थेला बसलेला फटका व कोट्यवधी लोकांचे रोजगार हिसकावून घेतल्याच्या पार्श्‍वभूमीवर करदात्यांना केंद्रीय प्रत्यक्ष कर बोर्ड (सीबीडीटी) हा दिलासा दिला आहे. 2019-20 या आर्थिक वर्षासाठीचे विवरणपत्र भरण्यास 31 डिसेंबरपर्यंत आणकी मुदतवाढ दिल्याचे दुपारी ट्विटरद्वारे जाहीर करण्यात आले. ज्या करदात्यांच्या खात्यांचे लेखापरीक्षण करणे आवश्‍यक असते त्यांच्यासाठी आयटीआर भरण्याची नवीन मुदत त्यापुढचा महिनाभर म्हणजे 31 जानेवारी 2021 ही करण्यात आली आहे.

कोरोनाचा प्रकोप मार्चच्या सुरवातीला झाला. त्यानंतर लॉकडाऊन लागल्यावर देशात कोरोनाबरोबरच उद्योगांवरही संक्रांत कोसळली. परिणामी कोट्यवधी तरूणांना व नागरिकांना रोजगार गमवावे लागले. विशेषतः खासगी व असंघटित क्षेत्रातील रोजगारांवर जोरदार कुऱ्हाड चालविण्यात आली. या पार्श्‍वभूमीवर करदाते व कर्जदाते यांना दिलासा देण्यासाठी केंद्रीय वित्त मंत्रालयाने अनेक घोषणा केल्या. यंदाच्या कोरोना काळात आर्थिक समस्यांमुळे ज्यांना वेळेवर विवरणपत्र भरणे शक्‍य नाही त्यांना जास्त वेळ मिळावा यादृष्टीने ही मुदत वाढवण्यात आली आहे. करदात्यांना प्राप्तिकर विवरणपत्राची मुदत आधी 31 जुलै व नंतर 30 नोव्हेंबरपर्यंत वाढविण्यात आली होती. ज्यांच्या खात्यांचे लेखापरीक्षण व्हायचे असते त्यांच्यासाठी सीबीडीटीने हीच कालमर्यादा 31 ऑक्‍टोबरवरून 31 जानेवारीपर्यंत वाढविली आहे.