हॉस्पिटलमध्ये चोरटे घुसले अन् पैसे, इतर वस्तूंना हात न लावता घेऊन गेले फक्त कोरोना लस

नवी दिल्ली : देशात कोरोना संसर्गाची दुसरी लाट आली असून, सरकारने लसीकरणावर भर दिला आहे. सरकारने लसीकरणावर भर दिला असला तरी देशात अनेक राज्यात लशीची टंचाई आहे. असे असताना भाजपशासित हरियानात मात्र, सरकारी रुग्णालयातून कुणीतरी  लशीचे 1 हजार 700 डोस चोरून नेल्याचा खळबळजनक प्रकार समोर आला आहे. 

पोलिसांनी दिलेल्या माहितीनुसार, जिंदमधील कोविड रुग्णालयात काल (ता.21) रात्री ही घटना घडली. रुग्णालयातून कोव्हिशिल्डचे 1 हजार 270 डोस आणि कोव्हॅक्सिनचे 440 डोस चोरीला गेले. चोरट्यांनी स्टोअररुममधील इतर लशी, औषधे, रोख रक्कम यांना अजिबात हात लावला नाही. केवळे कोरोना लशीचे डोस घेऊन चोरटे पसार झाले. 

स्टोअररुमची स्वच्छता करण्यासाठी सकाळी कामगार आल्यानंतर ही बाब उघडकीस आली. त्याला स्टोअर रुम आणि डीप फ्रिजरचे कुलूप उघडे दिसले. दरम्यान, रुग्णालयाकडे लशीचा पुरेसा साठा उपलब्ध आहे, असे स्पष्ट करण्यात आले आहे.पोलिसांनी या प्रकरणी गुन्हा दाखल केला असून, तपास सुरू आहे. 

देशात 18 वर्षांवरील व्यक्ती 1 मेपासून कोरोना लस घेण्यास पात्र आहेत. ते सरकारच्या को-विन प्लॅटफॉर्मवर शनिवारपासून (ता.24) नाव नोंदवू शकतात. नाव नोंदवल्यानंतर ते लसीकरण केंद्रावर जाऊन नियोजित वेळी लस घेऊ शकतात. केंद्र सरकारने सर्वांना लस देण्याची घोषणा केली. कोरोना विरोधात लढण्यासाठी सरकारने हे पाऊल उचलले आहे.

सध्या देशात कोरोना लसीकरणाचा तिसरा टप्पा सुरू आहे. या टप्प्यात 1एप्रिलपासून 45 वर्षांवरील सर्व नागरिकांना ही लस दिली जात आहे. सरकारी रुग्णालयात ही लस मोफत देण्यात येत आहे. मात्र, खासगी रुग्णालयात यासाठी 250 रुपये मोजावे लागत होते. सरकारने आता ही किंमत कमी करुन 200 रुपयांवर आणली आहे. 

जगातील सर्वात मोठ्या कोरोना लसीकरणास भारतात 16 जानेवारीला सुरवात झाली. पंतप्रधान नरेंद्र मोदी यांच्या हस्ते या मोहिमेचे उद्घाटन करण्यात आले होते. सरकारने लस देण्याचा प्राधान्यक्रम ठरवला आहे. यातील पहिल्या टप्प्यात आरोग्य कर्मचारी, कोरोनाच्या आघाडीवर लढणारे पोलीस, नागरी सुरक्षा कर्मचारी आणि स्वच्छता कर्मचारी यांचा समावेश होता. लसीकरणाच्या दुसऱ्या टप्प्यात ही लस 60 वर्षांवरील ज्येष्ठ नागरिकांना देण्यात आली. तसेच, मधुमेह आणि उच्च रक्तदाबासह इतर आजार असलेल्या 45 वर्षांवरील रुग्णांनाही लस दिली गेली. 

देशात कोव्हिशिल्ड आणि कोव्हॅक्सिन या दोन लशींचा वापर लसीकरणासाठी होत आहे. आता केंद्र सरकारने रशियाच्या स्पुटनिक व्ही या लशीच्या आपत्कालीन वापरास परवानगी दिली आहे. स्पुटनिकचे उत्पादन डॉ.रेड्डीज ही कंपनी करीत आहे. सिरम इन्स्टिट्यूट ही कोव्हिशिल्ड या कोरोना लशीचे उत्पादन करीत आहे. ही लस ऑक्सफोर्ड युनिव्हर्सिटी आणि अॅस्ट्राझेन्का यांनी विकसित केली आहे. दुसरी लस ही भारत बायोटेकची कोव्हॅक्सिन ही आहे.  

Edited by Sanjay Jadhav