दिल्लीत भाजपचा दारूण पराभव; ‘आप’ने हॅटट्रिक करत मारले मैदान

नवी दिल्ली : पंजाबमधील लोकसभेच्या पोटनिवडणुकीत पराभवाचा धक्का बसला असला तरी राजधानी दिल्लीमध्ये आम आदमी पक्षाने आपला करिष्मा कायम राखला आहे. पक्षाने राजेंद्र नगर विधानसभेच्या पोटनिवडणुकीत दणदणीत विजय मिळवत भाजपचा (BJP) पराभव केला. त्यामुळे मुख्यमंत्री अरविंद केजरीवाल यांना मोठा दिलासा मिळाला आहे. आगामी निवडणुकांच्या तोंडावर आपला हा विजय मिळाल्याने महत्व प्राप्त झाले आहे. (Delhi Bypoll Results Latest Update)

आपचे उमेदवार दुर्गेश पाठक यांना 40 हजार 319 मतं मिळाली. तर भाजपचे उमेदवार राजेश भाटिया यांना 28 हजार 851 मतांवर समाधान मानावे लागले. त्यांचा 11 हजारांहून अधिक मतांनी पराभव झाला आहे. काँग्रेसच्या उमेदवार प्रेम लता तिसऱ्या क्रमांकावर राहिल्या.

राजेंद्र नगर विधानसभा मतदारसंघातून यापूर्वी विजयी झालेल्या राघव चढ्ढा हे राज्यसभेत गेले आहे. त्यामुळे त्यांनी आमदारकीचा राजीनामा दिला होता. त्यामुळे पोटनिवडणुकीत झाली. या निवडणुकीत आपने हॅट्रिक करत भाजपला धूळ चारली आहे.

पंजाबमध्ये धक्कादायक पराभव

काही महिन्यांपूर्वीच विधानसभेच्या पोटनिवडणुकीत ऐतिहासिक विजय मिळवून पंजाबमध्ये सत्ता काबीज केलेल्या आम आदमी पक्षाला (AAP) राज्यात पहिला मोठा धक्का बसला आहे. लोकसभेच्या पोटनिवडणुकीत पक्षाच्या उमेदवाराचा पराभव झाला आहे. मुख्यमंत्री भगवंत मान यांच्याच पूर्वीच्या मतदारसंघात हा पराभव पत्करावा लागल्याने मान यांच्यावर नामुष्की ओढवली आहे. (Punjab Loksabha Bypoll Result Update)

भगवंत मान (Bhagwant Mann) हे विधानसभेच्या निवडणुकीत निवडून आल्यानंतर त्यांनी लोकसभेचा राजीनामा दिला होता. त्यामुळे संगरूर मतदारसंघात पोटनिवडणूक झाली. या निवडणुकीत शिलोमणी अकाली दल (अमृतसर) पक्षाचे अध्यक्ष सिमरनजित सिंग मान या 77 वर्षीय नेत्यानं आपच्या उमेदवाराला धूळ चारली आहे. आपणे गुलमेल सिंग यांना उमेदवारी दिली होती. त्यांचा 5 हजार 800 मतांनी पराभव झाला आहे.

सिमरनजित सिंग यांच्या पक्षाचा आणि शिरोमणी अकाली दलाचा काहीही संबंध नाही. या निवडणुकीत काँग्रेसचे उमेदवार दरवील सिंग गोल्डी, भाजचे केवळ ढिल्लन आणि अकाली दलाचे कमलदीप कौर राजौना यांना अनुक्रमे तिसरा, चौथा व पाचव्या स्थानावर समाधान मानावे लागले.

ही पोटनिवडणुकीत मान यांच्यासाठी प्रतिष्ठेची मानली जात होती. पंजाबमध्ये आपची सत्ता आल्यानंतर ही पहिलीच निवडणूक होती. संगरूर मतदारसंघ हा आपचा गड मानलो जातो. या मतदारसंघातील सर्व नऊ विधानसभा मतदारसंघात आपचे उमेदवार निवडून आले आहेत.

भगवंत मान हे 2014 च्या मोदी लाटेत या मतदारसंघातून निवडून येत लोकसभेत पोहचले होते. त्यांनी विरोधी उमेदवाराचा तब्बल 2 लाख 11 हजार मतांनी पराभव केला होता. 2019 च्या निवडणुकीतही त्यांनी काँग्रेसच्या उमेदवाराचा तब्बल 1 लाख 10 हजार मतांनी पराभव केला होता. पण आता मान हे मुख्यमंत्री असताना त्यांच्या गडातच पक्षाच्या उमेदवाराचा पराभव झाल्याने धक्का मानला जात आहे.