Dharmendra Pradhan Resigns : अखेर मोदी सरकार आंदोलकांसमोर झुकलं : केंद्रीय शिक्षणमंत्री धर्मेंद्र प्रधान यांचा राजीनामा

Dharmendra Pradhan News : केंद्रीय शिक्षणमंत्री धमेंद्र प्रधान यांनी अखेर राजीनामा दिला आहे. मागील महिन्याभरापासून जंतर मंतरवर सीजेपीकडून आंदोलन करण्यात येत होते. त्याला अखेर यश आले आहे. धमेंद्र प्रधान यांनी एक्सवर आपण राजीनामा देत असल्याचे जाहीर केले. आपण आपला राजीनामा पंतप्रधान नरेंद्र मोदी यांना पाठवल्याचे त्यांनी सांगितले आहे.

आज आंदोलकांसोबत सरकार चर्चा करणार होते. मात्र, जोपर्यंत धर्मेंद्र प्रधान यांचा राजीनामा घेत नाही तोपर्यंत चर्चा करणार नसल्याची भूमिका अभिजीत दीपके यांनी घेतली होती. शिवाय विरोधी पक्षांनीही प्रधान यांचा राजीनामा घेतला जात नाही तोपर्यंत संसदेत चर्चा करणार नसल्याचे म्हंटले होते. त्यामुळे सरकारवर मोठा दबाव आला होता.

प्रधान यांच्या राजीनाम्यासाठी जंतर मंतरसह देशात विविध ठिकाणी आंदोलन होत होते. या आंदोलनाला तरुणांचा मोठा पाठींबा मिळत होता. दरम्यान, आंदोलनामुळे मागील 12 वर्षात पहिल्यांदाच मोदींच्या मंत्रिमंडळातील एका मंत्र्याने राजीनामा देण्याची ही पहिलीच वेळ असल्याचे सांगितले जात आहे.

विरोधी पक्षनेते राहुल गांधी यांनी आज सकाळी पत्रकार परिषद घेत सांगितले होते की, सरकार प्रधान यांचा राजीनामाच्या ऐवजी त्यांचे खाते बदलण्याचा विचार करत आहे. मात्र, आमचा त्याला विरोध असून आम्ही राजीनाम्यावर ठाम असल्याचे त्यांनी सांगितले होते.

मोदी-शहापण जातील

धर्मेद्र प्रधान यांचा राजीनाम्यानंतर शिवसेना उद्धव बाळासाहेब ठाकरे पक्षाचे खासदार संजय राऊत यांनी ट्विट करत म्हटले की, धर्मेद्र प्रधान यांचा राजीनामा; मोदी शहा अजेय नाहीत.. ते देखील जातील. दरम्यान, ठाकरे बंधूंनी उद्या मोर्चाचे आयोजन केले आहे. तो मोर्चा आता होणार की नाही, हे समजू शकले नाही.