Girish Mahajan On Ajit Pawar : '20 वर्षे अजितदादांनी एक रूपयाही दिला नाही; महाजन असं का म्हणाले?

Pune News : भाजप नेते सनी निम्हण यांनी आयोजित केलेल्या पुण्यातील एका कार्यक्रमात महायुतीचे अनेक नेते उपस्थित होते. याच कार्यक्रमात बोलत असताना अजित पवार यांनी गिरीश महाजन यांची प्रशंसा केली. महाजन यांच्या फिटनेसबद्दल पवारांनी त्यांची स्तुती केली. यावर आता गिरीश महाजन यांनी प्रतिक्रिया दिली आहे. (Latest Marathi News)

अजित पवारांनी तुमच्या फिटनेसबद्दल तुमचं कौतुक केलं आहे, असा प्रश्न विचारले असता. महाजन म्हणाले,"आज मैत्रीचादिवस आहे. अजित पवारांचा आणि माझा सुरूवातीपासून एकमेकांना राजकीय विरोध होता. अजित पवारांनी आपल्या वीस एक वर्षांच्या कार्यकाळात सरकारमध्ये असताना माझ्या मतदारसंघासाठी एक रुपयाही कधी दिलेला नव्हता. त्यांनी मला एकदा आव्हान दिलं होतं की, तुझ्या मतदारसंघासाठी एक रूपयाही देणार नाही. त्यांनी त्यांचा शब्द पाळला आहे. मात्र आम्ही आता मित्र झालो आहोत. माझं ते कौतुक करत होते."

“अजित पवार जेव्हाही मला भेटतात, तेव्हा ते माझे दंड बघतात, विचारता कसं केलं. मी त्यांना म्हणतो, दादा यासाठी रोज व्यायाम करायला पाहिजे. दररोज एक तास जिमध्ये घालवतो. खाण्यापिण्यावर माझं पत्थ्यं आहे. तळलेले पदार्थ मी खात नाही. हाँटेलमधलं काही खात नाही. प्रवासात जरी असलो तरी घरचं जेवण करतो. कधी - कधी कार्यकर्त्यांकडून डब्बा मागवून घेतो आणि गाडीतच जेवतो. केवळ राजकारणी लोकांनीच नव्हे, या गोष्टी केल्या पाहिजेत," असे गिरीश महाजन म्हणाले.