Shanti Bhushan Passes Away : माजी कायदे मंत्री तथा ज्येष्ठ वकील शांती भूषण यांचं निधन

Shanti Bhushan Death : माजी कायदे मंत्री आणि वरिष्ठ वकील शांती भूषण यांचे वृद्धापकाळाने निधन झाले आहे. ते ९७ वर्षाचे होते. त्यांनी दिल्ली येथील त्यांच्या राहत्या घरी अखेरचा श्वास घेतला. गेल्या काही दिवसांपासून त्यांची तब्येत बरी नव्हती. वरिष्ठ वकील आणि मानवाधिकार कार्यकर्ते अॅड. प्रशांत भूषण हे त्यांचे पुत्र आहेत.

अलाहाबाद न्यायालयातील राज नारायण या प्रसिद्ध खटल्यातील ते नारायण यांचे वकील होते. या खटल्यादरम्यान त्यांच्या युक्तिवादामुळे सन १९७४ मध्ये इंदिरा गांधी (Indira Gandhi) यांची खासदारकी रद्द झाली होती. तसेच पुढील सहा वर्षांसाठी त्यांना निवडणूक लढवण्यावर बंदी घालण्यात आली होती.

माजी कायदे मंत्री आणि वरिष्ठ वकील शांती भूषण यांनी भ्रष्टाचार आणि नागरी स्वातंत्र्यासाठी अनेक कायदेशीर लढाया दिल्या आहेत. तसेच १९७७ ते १९७९ या दरम्यान, त्यांनी तत्कालीन पंतप्रधान मोरारजी देसाई (Morarji Desai) यांच्या मंत्रिमंडळात भारताचे कायदे मंत्री म्हणून काम पाहिले होते.