Crime News : होळीच्या रंगात रक्ताचा सडा! भरदिवसा कुऱ्हाडीचे सपासप वार, 3 महिलांसह एकाचा जागीच मृत्यू

होळीच्या सणाच्या आनंदावर पाणी फेरत धक्कादायक घटना घडली आहे. उत्तर प्रदेश मधील बहराइच तालुक्यातील बसंतपूर उदल या गावात मध्यरात्री एका कुटुंबावर कुऱ्हाडीने भीषण हल्ला करण्यात आला. या हल्ल्यात चार जणांचा जागीच मृत्यू झाला, तर दोघे गंभीर जखमी झाले आहेत. मृतांमध्ये तीन महिलांसह एका पुरुषाचा समावेश आहे. कौटुंबिक वादातून ही रक्तरंजित घटना घडल्याची प्राथमिक माहिती समोर आली आहे.

मिळालेल्या माहितीनुसार, ही घटना रात्री साधारण साडेबारा वाजण्याच्या सुमारास घडली. कुटुंबीय घरात झोपेत असताना अचानक हल्लेखोराने कुऱ्हाडीने सपासप वार करण्यास सुरुवात केली. घरातून अचानक किंचाळण्याचे आवाज ऐकू येऊ लागल्याने शेजारी जागे झाले. मात्र लोक घटनास्थळी पोहोचेपर्यंत घराच्या अंगणात आणि खोलीत सर्वत्र रक्त सांडलेले होते. दृश्य इतके भीषण होते की गावकऱ्यांनाही धक्का बसला.

या हल्ल्यात शीतला देवी (वय 82), संजू देवी (वय 60), पार्वती (वय 20) आणि बदलूराम (वय 62) यांचा मृत्यू झाला. घराच्या अंगणात एका बाजूला पती-पत्नी तर दुसऱ्या बाजूला आई आणि मुलगी रक्ताच्या थारोळ्यात पडलेल्या अवस्थेत आढळून आल्या. गंभीर जखमी झालेल्यांमध्ये गुरुदेव (वय 40) आणि निरंकर (वय 30) यांचा समावेश आहे. दोघांनाही तातडीने जिल्हा रुग्णालयात दाखल करण्यात आले. त्यानंतर निरंकर यांची प्रकृती चिंताजनक असल्याने त्यांना पुढील उपचारांसाठी लखनऊ येथील ट्रॉमा सेंटरमध्ये हलवण्यात आले.

घटनेची माहिती मिळताच पोलिसांनी तातडीने घटनास्थळी धाव घेतली. चारही मृतदेह ताब्यात घेऊन शवविच्छेदनासाठी पाठवण्यात आले. प्राथमिक चौकशीत कौटुंबिक व मालमत्तेच्या वादातून हा हल्ला झाल्याचे समोर आले आहे. आरोपी गेल्या काही दिवसांपासून मानसिक तणावाखाली होता, अशी माहिती स्थानिकांनी दिली आहे.

फॉरेन्सिक पथकाने घराच्या आत आणि बाहेर सखोल तपास करून विविध पुरावे गोळा केले. हल्ल्यात वापरण्यात आलेली कुऱ्हाड पोलिसांनी जप्त केली आहे. घरातील वस्तू अस्ताव्यस्त पडलेल्या होत्या आणि सर्वत्र रक्ताचे डाग दिसत होते. वारंवार होणाऱ्या कौटुंबिक वादामुळे परिस्थिती चिघळत गेली आणि अखेर त्याचे रूपांतर या भीषण हत्याकांडात झाले, अशी चर्चा गावात सुरू आहे. पोलिसांनी संशयित आरोपीला ताब्यात घेतले असून पुढील तपास सुरू आहे.