Chhatrapati Shivaji Maharaj : शिवाजी महाराज नसते तर माझे नाव कलीमुद्दीन असते..! भाजपच्या बड्या नेत्याचं विधान

BJP Politics : छत्रपती शिवाजी महाराज यांची जयंती देशभरात उत्साहात साजरी करण्यात आली. मध्य प्रदेशातही शिवजयंतीचा उत्साह होता. याप्रसंगी बोलताना भाजपचे बडे नेते व कॅबिनेट मंत्री कैलाश विजयवर्गीय यांनी केलेले विधान चर्चेत आले आहे. शिवाजी महाराज नसते तर आपले नाव कैलाशऐवजी ‘कलीमुद्दीन’ झाले असते, असे विजयवर्गीय म्हणाले आहेत.  

शिवाजी महाराजांच्या योगदानावर बोलताना विजयवर्गीय यांनी हे वक्तव्य केले आहे. ते म्हणाले, शिवाजी महाराजांमुळे मालवा आणि जवळपासच्या भागात मुघलांना प्रवेश मिळाला नव्हता. त्यावेळी शिवाजी महाराज नसते तर आपले नाव कलीमुद्दीन झाले असते. शिवाजी महाराजांचे साहस आणि संघर्षामुळेच देशातील अनेक भागांमध्ये मुघलांचा हस्तक्षेप थांबला.

विजयवर्गीय यांनी शिवाजी महाराजांचा पराक्रम आणि त्यांचे योगदान अत्यंत महत्वपूर्ण असल्याचे सांगितले. तसेच महाराजांचे आदर्शांचे पालन करण्याचे आवाहनही विजयवर्गीय यांनी उपस्थितांना केले. विजयवर्यीग यांनी सोशल मीडियातही शिवाजी महाराजांना अभिवादन करताना त्यांच्या शौर्याला नमन केले आहे.

विजयवर्गीय यांनी एक्सवर केलेल्या पोस्टमध्ये म्हटले आहे की, भारताच्या गौरवशाली अस्मितेचे प्रतिक, हिंदवी स्वराज्याचे निर्माते, अद्वितीय पराक्रम आणि शौर्याचे प्रतिक छत्रपती शिवाजी महाराज यांच्या जयंतीनिमित्त त्यांना शत-शत नमन. आज या प्रसंगी इंदौरमध्ये काढण्यात आलेल्या वाहनांच्या भव्य रॅलीमध्ये सहभागी झाल्याचेही विजयवर्गीय यांनी म्हटले आहे.

आग्रा येथे स्मारक उभारणार – फडणवीस

महाराष्ट्राचे मुख्यमंत्री देवेंद्र फडणवीस यांनी आग्रा येथे शिवाजी महाराजांचे स्मारक उभे करण्याची घोषणा केली आहे. ताजमहालपेक्षा हे स्मारक भव्य असेल, असे फडणवीस यांनी जाहीर केले. या स्मारकासाठी आग्रा येथे जमीन देण्याचे आवाहनही त्यांनी उत्तर प्रदेशचे मुख्यमंत्री योगी आदित्यनाथ यांना केले.