India vs Pakistan : IMF च्या भिकेपेक्षा काश्मीरचे बजेट दुप्पट, PoK सोडा! भारतीय महिला अधिकाऱ्यांनी पाकिस्तानला धू धू धुतले…

India Pakistan UN debate : जागतिक व्यासपीठावर सातत्याने भारताकडून मानवाधिकारांचे उल्लंघन केले जात असल्याचे रडगाणे गाणाऱ्या पाकिस्तानची भारतीय महिला अधिकाऱ्याने आज बोलती बंद केली. पाकिस्तानचा अजेंडा मोडून काढताना त्यांच्या अर्थव्यवस्थेबाबत आरसाही दाखविला. तसेच थेट पाकव्याप्त काश्मीर सोडा, असेही ठणकावून सांगितले.

नेमकं काय घडलं?

संयुक्त राष्ट्र मानवाधिकार परिषदेच्या ५५ व्या सत्रामध्ये IFS सेवेतील अधिकारी अनुपमा सिंह या भारताचे प्रतिनिधित्व करत आहेत. परिषदेमध्ये पाकिस्तानने काश्मीरच्या मुद्यावर भारतावर निशाणा साधण्याचा प्रयत्न केला होता. सिंह यांनी भारताची प्रतिमा मलीन करण्याचे पाकिस्तानेच मनसुबे उधळून लावले. त्यामुळे खोटे आरोप करणाऱ्या पाक तोंडावर आपटले.

पाकिस्ताने भारताच्या जमिनीवर बेकायदेशीरपणे कब्जा केला आहे. त्यामुळे त्यांनी पीओके सोडायला हवे, असे सिंह यांनी ठणकावून सांगितले. जम्मू-काश्मीरमध्ये बनविण्यात आलेला जगातील सर्वात उंच चिनाब रेल्वे पुल पाकिस्तानला नकली वाटत असेल तर त कदाचित सद्यस्थितीपासून खूप दूर असून काल्पनिक जगात जगत असल्याचेही त्या म्हणाल्या.

जम्मू आणि काश्मीरचे बजेट पाकिस्तानला IMF कडून नुकत्याच मिळालेल्या पॅकेजपेक्षा दुप्पट आहे. पाकिस्तान त्यासाठी आयएमएफपुढे झोळी पसरत असते, असे सांगत सिंह यांनी पाकला आरसा दाखविला. जम्मू-काश्मीर भारताचे अभिन्न अंग आहे. १९४७ च्या इंडियन इंडिपेडेंस कायदा आणि आंतरराष्ट्रीय कायद्यानुसार भारतातील समावेश कायदेशीर आहे. खरा मुद्दा पाकने बेकायदेशीरपणे काश्मीरवर केलेला कब्जा हा आहे, असे सिंह म्हणाल्या.

लोकशाहीवरूनही सिंह यांनी पाकिस्तानला खडेबोल सुनावले. ज्या देशातील सरकारे आपला कार्यकाळ पूर्ण करू शकत नाहीत, त्यांनी लोकशाहीवर भाषण ठोकणे योग्य नाही. जम्मू-काश्मीर विधानसभा निवडणुकीत झालेल्या विक्रमी मतदानातून तेथील लोकांनी दहशतवाद आणि हिंसेचे राजकराण नको असल्याचे दाखवून दिले आहे. आता ते विकासाच्या मार्गावर पुढे जात आहे. पाकिस्ताने आंतरराष्ट्रीय व्यासपीठावरून भाषणबाजी करण्यापेक्षा देशातील अंतर्गत संकटावर लक्ष द्यायला हवे, असेही अनुपमा सिंह यांनी पाकला सुनावले.