kiren Rijiju News : संसदेत ‘स्मोकिंग रूम’ची किरेन रिजिजूंनी केली होती मागणी; अध्यक्षांच्या कानातून धूर निघाला...

Indian parliament controversy : सार्वजनिक ठिकाणी धूम्रपान करू नये, असे फलक तुम्हाला ठिकठिकाणी दिसतील. नियमांचे उल्लंघन केलेल्यांवर कारवाईही झाली आहे. तसे कायदेही आहेत. पण हे कायदे करणाऱ्या कायदेमंडळाच्या आवारातच धूम्रपानाला कुणी परवानगी मागितली तर? वाचून धक्का बसला असेल. पण असे घडले होते.

भाजपचे नेते व केंद्रीय संसदीय कामकाज मंत्री किरेन रिजिजू यांच्याच बाबतीत हा प्रसंग घडला आहे. दिल्लीत शनिवारी झालेल्या एका कार्यक्रमादरम्यान रिजिजू यांनी संसदेतील सुरूवातीच्या दिवसांमधील एक किस्सा सांगितला. तसेच यावेळी संसदेतील शिष्टाचार आणि संयमाबाबतही आपली भूमिका मांडली.

रिजिजू यांनी सांगितले की, मी पहिल्यांदाच लोकसभा अध्यक्ष सोमनाथ चॅटर्जी यांना भेटलो होतो. तेव्हा मी त्यांच्याकडे स्मोकिंग करणाऱ्या खासदारांसाठी संसदेत एक खोली मागण्यासाठी गेलो होतो. तेव्हा अध्यक्षांनी आपल्याला चांगलेच सुनावले होते, अशी आठवण रिजिजू यांनी सांगितली.

लोकसभा अध्यक्षांसोबत ही तुमची पहिली भेट आहे आणि तुम्ही यासाठी आला आहात?, असे सोमनाथ चॅटर्जी संतापून म्हणाल्याची आठवण रिजिजू यांनी सांगितली. एवढ्या मोठ्या पदांवरील व्यक्तींना भेटताना तुमच्याकडे एखादा चांगला उद्देश असायला हवा, अशी शिकवण या भेटीतून मिळाल्याचेही रिजिजू यांनी सांगितले.

अटल बिहारी वाजपेयी आणि लालकृष्ण अडवाणी यांच्यासारख्या ज्येष्ठ नेत्यांनी संसदीय शिष्टाचारबाबत एक आदर्श निर्माण केला. त्यावेळी आम्ही संसदेत बोलताना दोनदा विचार करायचो. कारण दिग्गज लोक ऐकत असायचे. आता पहिल्या दिवसापासूनच अडथळे येतात. बहुतेक सोशल मीडियामुळे काही गोष्टी बदलल्या असल्याचे रिजिजू म्हणाले.

संसदेचे पावसाळी अधिवेशन सुरू आहे. पहिल्या दिवसापासूनही विरोधकांकडून कामकाजात अडथळे आणले जात असल्याचा संदर्भ देत रिजिजू म्हणाले, संसदेचे कामकाज ठप्प झाल्याने सरकारलाच फायदा होतो. कारण संसदेच सरकार विरोधकांच्या प्रश्नांना उत्तर देऊ शकते. असे झाले नाही तर प्रश्नच येत नाहीत आणि अधिकारी निश्चिंत होतात.