अण्णाद्रमुकसह शशिकलांना मोठा धक्का! जयललितांच्या मृत्यूनंतर भाची बनली वारसदार

नवी दिल्ली : तामिळनाडू्च्या माजी मुख्यमंत्री जयललिता (Jayalalithaa) यांच्या निवासस्थानाचे स्मृतिस्थळात रुपांतर करण्याच्या निर्णय उच्च न्यायालयाने (High Court) रद्द केला होता. यानंतर अखेर जयललितांच्या मृत्यूनंतर त्यांची भाची दीपा जयकुमार यांचे चेन्नईतील पोएस गार्डन निवासस्थानात पाऊल पडले आहे. यामुळे अण्णाद्रमुकसह (AIADMK) जयललितांच्या निकटवर्ती व्ही.के. शशिकला (V.K.Sasikala) यांना मोठा धक्का बसला आहे.

पोएस गार्डन निवासस्थानात तब्बल तीन दशके जयललिता यांचे वास्तव्य होते. या निवासस्थानात कार्यालय, वाचनालय, प्रतिक्षागृह आणि सभागृहाचा समावेश आहे. जयललिता यांच्या आईने १९६० मध्ये ते खरेदी केले होते. तत्कालीन मुख्यमंत्री के.पलानीस्वामी यांच्या नेतृत्वाखालील अण्णाद्रमुक सरकारने (AIADMK) २०१७ मध्ये जयललिता यांच्या स्मरणार्थ या निवासस्थानाचे स्मृतिस्थळात रूपांतर करण्याची घोषणा केली होती. राज्य सरकारने २२ जुलै २०२० रोजी जयललिता यांच्या निवासस्थानाचे स्मृतिस्थळात रूपांतर करण्याचा आदेश काढला होता.

याला जयललितांची भाची दीपा जयकुमार यांनी उच्च न्यायालयात आव्हान दिले होते. न्यायालयाने या निवासस्थानाला स्मृतिस्थळ बनवण्याचा आदेश रद्द केला. हे निवासस्थान जयललितांच्या कायदेशीर वारसांच्या ताब्यात देण्याचा आदेश न्यायालयाने दिला होता. अखेर चेन्नई जिल्हा प्रशासनाने दीपा यांच्याकडे या निवासस्थानाच्या चाव्या सोपवल्या. त्यानंतर त्यांचे पाऊल पोएस गार्डन निवासस्थानात पडले आहे.

निवासस्थानात पाऊल टाकताच दीपा आणि त्यांचे पती माधवन यांनी जयललितांच्या प्रतिमेला पुष्पहार अर्पण करून अभिवादन केले. त्यावेळी त्या म्हणाल्या की, माझ्या आत्याच्या अनुपस्थित मी पहिल्यांदाच निवासस्थानात येत आहे. आता हे घर खूप रिकामे आणि मोकळेमोकळे वाटत आहे. माझी आत्या वापरत असलेले फर्निचरही काढून टाकण्यात आले आहे. आता मी याच निवासस्थानात राहणार आहे.