Jharkhand Assembly Election: मुख्यमंत्री पती अन् आमदार पत्नी एकाचवेळी निवडणुकीच्या रिंगणात; ही जोडी इतिहास रचणार?

Ranchi News : झारखंड विधानसभा निवडणुकीत सर्वच पक्षांनी कंबर कसली असून एनडीए विरुध्द इंडिया आघाडी अशी थेट लढत होत आहे. या निवडणुकीत पहिल्यांदाच मुख्यमंत्री हेमंत सोरेन आणि त्यांच्या आमदार पत्नी कल्पना सोरेन एकाचवेळी निवडणुकीच्या रिंगणात उतरले आहेत. त्यामुळे दोघांसाठीही ही निवडणूक ऐतिहासिक ठरणार आहे.

मागील वर्षभरात झारखंडमध्ये अनेक राजकीय घडामोडी घडल्या आहे. यापाश्वभूमीवर ही निवडणूक होत असल्याने कोण बाजी मारणार, याबाबत उत्सुकता वाढली आहे. हेमंत सोरेन यांनी शुक्रवारी बरहेट मतदारसंघातून उमेदवारी अर्ज दाखल केला. तर त्यांच्या पत्नी कल्पना यांनी गांडेय मतदारसंघातून पुन्हा आपले नशीब आजमावणार आहेत.

सोरेन कुटुंबातील पती-पत्नी एकाचवेळी निवडणूक रिंगणात उतरण्याची ही पहिलीच वेळ आहे. कल्पना यांच्या राजकारणातील एन्ट्रीआधी अनेक घडामोडी घडल्या. लोकसभा निवडणुकीआधी हेमंत सोरेन यांना ईडीने अटक केली. त्याआधीच त्यांनी मुख्यमंत्रिपदाचा राजीनामा दिला. त्यांच्यानंतर चंपई सोरेन मुख्यमंत्री बनले.

हेमंत सोरेन यांना ईडीकडून अटक होणार, याची चर्चा अनेक दिवस आधीपासून होती. त्यामुळे कल्पना सोरेन मुख्यमंत्रिपदाच्या खुर्चीवर विराजमान होतील, असेही तर्कवितर्क लढवले जात होते. पण चंपई सोरेन यांच्या गळ्यात या पदाची माळ टाकण्यात आली. त्यानंतरही कल्पना सोरेन यांनी गांडेय मतदारसंघाची पोटनिवडणूक लढवली आणि विजयी झाल्या.

हेमंत सोरेन यांच्या अनुपस्थितीत कल्पना सोरेन यांनी विरोधकांचे आरोप परतावून लावण्यासाठी जोरदार किल्ला लढवला. आता पुन्हा एकदा त्या विरोधकांना धूळ चारण्यासाठी विधानसभेच्या रिंगणात उतरल्या आहेत. पण यावेळी पती हेमंत सोरेन यांच्यासोबत त्या पहिल्यांदाच निवडणूक लढवत असल्याने ही निवडणूक दोघांसाठीही वेगळी ठरणार आहे.

सोरेन पती-पत्नी दोघेही विजयी झाल्यास झारखंडमध्ये इतिहास घडणार आहे. पती-पत्नी एकाचवेळी विधानसभेत जातील. इंडिया आघाडीची पुन्हा सत्ता आल्यास हेमंत सोरेन हेच मुख्यमंत्री असतील. तर कल्पना यांच्या खांद्यावरही सरकारमध्ये मोठी जबाबदारी टाकली जाऊ शकते. त्यामुळे या दोघांसह राज्यात कुणाची सत्ता येणार, याकडे संपूर्ण देशाचे लक्ष लागले आहे.