BJP leader murder : भाजप युवा मोर्चा नेत्याचा खून; सहा आरोपींना फाशी, राजकीय वर्तुळात खळबळ

Political murder case : कर्नाटक राज्यातील गंगावती शहराचे भाजप युवा मोर्चाचे शहराध्यक्ष वेंकटेश कुरूबर उर्फ जेएनएन वेण्की यांच्या खुनात सहा जणांना अतिरिक्त जिल्हा न्यायालयाने फाशीची शिक्षा ठोठावलीय.

न्यायाधीश सदानंद नागप्पा नाईक यांनी हा निकाल दिला. रवी, मैलारी, धनराज, भीमा, सलीम आणि गंगाधर गौळी अशी शिक्षा झालेल्या आरोपींची नावे आहेत.

या खटल्यात न्यायालयाने (Court) सीसीटीव्हीच्या चित्रीकरणाची तपासणी केली. तसेच आरोपींचा पूर्वीचा गुन्हेगारी इतिहासही पडताळून पाहिला. गंगावती रेल्वे स्थानकाजवळ मारुती नावाच्या युवकावर दगडाने हल्ला करून खून केला होता. त्या प्रकरणात वेंकटेश हे प्रत्यक्ष साक्षीदार होते.तसेच मारुतीच्या उपचारासाठी शेवटपर्यंत मदत केल्यामुळेच वेंकटेश यांचा खून केल्याचे निष्पन्न झाले.

सभ्य समाजात अशा प्रकारच्या क्रूर कृत्यांना स्थान नाही. आरोपींच्या गुन्हेगारी (Crime) पार्श्वभूमीचा विचार करून ही कठोर शिक्षा देण्यात येत आहे, असे न्यायाधीशांनी निकाल देताना नमूद केले.

या आधी न्यायालयाने सहा आरोपींना दोषी ठरवून शिक्षेचा निर्णय राखून ठेवला होता. आरोपींना आवश्यक असल्यास उच्च न्यायालयात अपील करण्याचा अधिकार असल्याचेही न्यायालयाने स्पष्ट केले. ही माहिती सरकारी वकील एस. नागलक्ष्मी यांनी दिली.

भाजप नेत्याच्या हत्येचा घटनाक्रम

गंगावती शहराच्या बाहेरील राणा प्रताप सिंग चौकातील खासगी रुग्णालयाजवळ आठ ऑक्टोबर 2025च्या मध्यरात्री वेंकटेश कुरूबर (वय 32) यांचा निर्घृण खून करण्यात आला होता. जुने वैमनस्य आणि मारुती नावाच्या व्यक्तीच्या उपचारासाठी मदत केल्याचा राग यामागील कारण असल्याचे पोलिसांनी सांगितले होते.

पाठलाग करून खून

त्या रात्री वेंकटेश मित्रांसोबत जेवण करून दुचाकीवरून जात असताना काही युवकांनी मोटारीने त्यांचा पाठलाग केला. त्यांच्या दुचाकीला धडक देऊन खाली पाडल्यानंतर धारदार शस्त्रांनी हल्ला करून त्यांचा खून केला.