Manoj Jarange Delhi Visit: मुंबईनंतर मनोज जरांगे आता थेट दिल्लीत धडकणार! केली मोठी घोषणा

Manoj Jarange Delhi Visit: मराठा समाजाला ओबीसीतून आरक्षण मिळावं यासाठी लढा उभारणारे आंदोलक मनोज जरांगे हे आता थेट दिल्लीत धडक देणार आहेत. त्यासाठी त्यांनी मोठी घोषणा केली असून त्यासाठी तयारीही सुरु केली आहे.

मराठा समाजाचं अधिवेशन

देशभरात विखुरलेल्या मराठा समाजाला एकत्र आणण्यासाठी दिल्लीत मराठा समाजाचं अधिवेशन आयोजित करण्यात आलं आहे. हैदराबाद गॅझेटियर आणि सातारा गॅझेटियरच्या अंमलबजावणीनंतर हे अधिवेशन पार पडणार आहे. त्याअनुषंगानं लवकरच या अधिवेशनाची तारीख जाहीर केली जाणार आहे. धाराशिव इथं हैदराबाद गॅझेटियर संदर्भात पार पडलेल्या एका बैठकीत मनोज जरांगे यांनी ही घोषणा केली.

धाराशीवमध्ये घोषणा

धाराशिवमध्ये जरांगेंनी आज सकल मराठा समाजाची बैठक घेतली. या बैठकीत त्यांनी आता चलो दिल्ली असा नारा दिला. हा दिल्लीचा दौरा म्हणजे कुठलंही आंदोलन किंवा मोर्चा नसेल. तसंच कुठल्याही मागणीसाठी हा दिल्लीचा दौरा नसेल. तर केवळ देशभरातील मराठा बांधवांना एकत्र करण्यासाठी हा दौरा असणार आहे. या अनुषंगानं दिल्लीत तयारी देखील सुरु केली आहे. पण अद्याप या अधिवेशनाची तारीख जाहीर झालेली नाही, ती लवकरच जाहीर करण्यात येईल, असंही त्यांनी सांगितलं आहे.

जरांगे नेमकं काय म्हणाले?

बैठकीनंतर जरांगे म्हणाले, "आपल्या राजानं अटकपासून कटकपर्यंत थेट अफगाणिस्तानपर्यंत झेंडे फडकावले आहेत. कुठं कुठं आपल्या राजाचे पाय लागले त्या भूमिका आपण नतमस्तक झालो पाहिजे राव. म्हणून एक दिवस आपल्या भावंडांसाठी आपल्या मराठा समाजासाठी आपण सगळे एकत्र भेटायचं दिल्लीला. त्यासाठी आम्ही मोठं अधिवेशन दिल्लीत घेत आहोत"