Mayawati News : मायावतींकडून भाच्याला मोठा झटका, आता भावासाठी पायघड्या!

Uttar Pradesh Politics : उत्तर प्रदेशच्या माजी मुख्यमंत्री व बहुजन समाज पक्षाच्या सुप्रीमो मायावती यांनी भाचा आकाश आनंद यांना जोरदार झटका दिला आहे. त्यांना पक्षातील सर्व पटांवरून हटवण्यात आले असून पक्षापासून दूर ठेवण्याचा निर्णय घेण्यात आला आहे. पक्षाच्या पदाधिकाऱ्यांच्या रविवारी झालेल्या बैठकीत काही महत्वपूर्ण निर्णय घेण्यात आले.

मायावती यांनी रविवारी पक्षाच्या देशभरातील प्रमुख पदाधिकाऱ्यांची बैठक घेतली. या बैठकीमध्ये काही पदांवर मोठे फेरबदल करण्यात आले आहेत. त्यानुसार दोन वे राष्ट्रीय समन्वयक नेमण्यात आले आहेत. विशेष म्हणजे त्यामध्ये एक नाव आकाश आनंद यांचे वडील आनंद कुमार यांचे आहे. ते पक्षाचे महासचिवही आहेत.

आनंद कुमार यांच्यासह राज्यसभेचे कासदार रामजी गौतम यांच्यावरही समनव्यक पदाची जबाबदारी सोपवण्यात आली आहे. मायावतींनी घेतलेल्या या महत्वाच्या बैटकीला आकाश आनंद उपस्थित नव्हते. त्यांना मायावती यांनी डिसेंबर 2023 मध्ये आपला उत्तराधिकारी म्हणून जाहीर केले होते. तसेच राष्ट्रीय समन्वयक हे पदही देण्यात आले होते.

लोकसभा निवडणुकीचे वारे वाहत असतानाच मायावती यांनी आपला निर्णय बदलला होता. आकाश आनंद यांना दोन्ही पदांवरून हटवण्यात आले होते. यामागे त्यांची वादग्रस्त विधाने कारणीभूत ठरली, अशी चर्चा आहे. आकाश आनंद यांनी भाजपचा सरकारल दहशतीचे सरकार असे म्हटले होते. त्यावरून त्यांच्यावर गुन्हाही दाखल झाला होता.

काहीवेळा भाषणादरम्यान बोलत असताना आकाश यांच्या तोंडून शिवराळ शब्द उच्चारण्यात आले होते. त्यावरून त्यांच्यावर बरीच टीकाही झाली होती. मायावती यांनीही नाराजी व्यक्त करताना त्यांचे कान टोचले होते. ते परिपक्व नसल्याचे सांगत मायावती यांनी आकाश हे राजकीयदृष्ट्या पूर्ण परिपक्व होईपर्यंत त्यांना पक्षातील जबाबदाऱ्यांपासून दूर ठेवले जाईल, असे सांगितल होते.