MCD Elections 2022 : दिल्ली महापालिका निवडणुकीत महिलांमध्ये चुरस , तीनही पक्षाकडून महिलांना प्राधान्य

MCD Elections 2022: दिल्ली महापालिका निवडणुकीसाठी काँग्रेस, भाजपने आणि आपने जोरदार तयारी केली आहे. या तीनही पक्षाकडून उमेदवारांची यादी जाहीर करण्यात आली आहे. यात तीनही पक्षानी महिलांना उमेदवारी दिली आहे. (MCD Elections 2022 news update)

दिल्ली महापालिकेच्या (MCD)च्या २५० वार्डांसाठी ४ डिसेंबर रोजी निवडणूक होत असून सात डिसेंबर रोजी निकाल जाहीर होणार आहे. या निवडणुकीत काँग्रेस, आप, भाजप या तीनही पक्षानी ५० टक्क्यांपेक्षाही अधिक जागांवर महिलांना उमेदवारी दिली आहे. आरक्षणानुसार २५० पैकी १२५ वार्ड हे महिलांसाठी आरक्षित आहेत.

यात आम आदमी पक्षाने २५० पैकी १४० जागांवर महिलांना निवडणुकीच्या रिंगणात उतरवले आहे, काँग्रेस आणि भाजपच्या महिला उमेदवारांच्या तुलनेत ही संख्या अधिक आहे.

भाजपने १३७ जागांवर, तर काँग्रेसने १३४ जागांवर महिला निवडणूक लढणार आहेत. काँग्रेसच्या तीन उमेदवारांचा अर्ज रद्द झाला आहे. त्यामुळे २४७ जागांवर काँग्रेसचे उमेदवार रिंगणात आहेत.

दिल्ली महापालिकेच्या निवडणुकीत एकूण १३४९ उमेदवार रिंगणात आहेत. यात ७०७ महिला, तर ६४० महिलांचा समावेश आहे. अर्ज भरण्याच्या शेवटच्या दिवशी (शनिवारी) ६७ जणांनी आपला उमेदवारी अर्ज मागे घेतला आहे.

६६ अपक्ष उमेदवारांनी आपला अर्ज मागे घेतला आहे. बहुजन समाज पक्षाच्या सहा जणांनी अर्ज मागे घेतला आहे. अर्ज मागे घेतलेल्या ६७ पैकी ३४ जण पुरुष उमेदवार आहेत, असे निवडणूक विभागाने सांगितले आहे.