Bihar CM Nitish Kumar : नितीशबाबूंचे मोदी-शाहांवर प्रेशर; दिल्लीत ‘अग्नी’ भडकणार

Modi Governemnt : पंतपधान नरेंद्र मोदींनी तिसऱ्या टर्मसाठी शपथ घेण्याआधीच एनडीएमध्ये प्रेशर पॉलिटिक्स सुरू झाले आहे. त्यामध्ये भाजपसाठी सर्वाधिक धोकादायक राहिलेले बिहारचे मुख्यमंत्री नितीश कुमारांनी आघाडी घेतली आहे. नव्या सरकारकडून मागण्या मान्य करून घेण्यासाठी नितीशबाबूंनी नाक दाबण्यास सुरूवात केली आहे.

मोदी सरकारची ‘अग्निवीर’ ही महत्वाकांक्षी योजना आहे. या योजनेचा सरकारने जोरदार प्रचार केला. पण प्रत्येक निवडणुकीत त्याचा फारसा प्रभाव पडला नाही. उलट बिहार आणि उत्तर प्रदेशात या योजनेमुळे एनडीएला फटका बसल्याची जोरदार चर्चा आहे. त्याचेच पडसाद आता नव्या सरकारमध्येही उमटण्याची चिन्हे आहेत.

अग्नवीर योजनेचा नव्याने विचार करण्याबाबत नितीश कुमार आग्रही असल्याचे समजते. त्याचप्रमाणे समान नागरी कायद्याबाबतही अनेक संभ्रम असल्याने त्यावरही व्यापक चर्चा होण्याची गरज नितीश कुमारांना वाटते. मात्र त्यांनी एक देश-एक निवडणूक या अजेंड्याला पाठिंबा दिल्याचे समजते.

अग्निवीर आणि युसीसीला निवडणुकीआधापासूनच जोरदार विरोध होत आहे. काँग्रेस व मित्रपक्षांनी सत्ता आल्यास ही योजना रद्द करण्याची घोषणा केली होती. बिहार, उत्तर प्रदेशातील प्रत्येक सभेत राहुल गांधी यांच्याकडून अग्निवीरचा उल्लेख केला जात होता. तरुणांना व्यासपीठावर बोलवून ते विचारपूस करत होते. याचा मोठा परिणाम, मतदानावर झाल्याने उत्तर प्रदेशात एनडीएची वाताहात झाल्याचे बोलले जात आहे.

नितीश कुमार यांनी हीच स्थिती विचारात घेऊन आपली मागणी पुढे रेटल्याचे समजते. त्याचप्रमाणे कॅबिनेटमध्ये अधिक मंत्रिपदे पदरात पाडून घेण्यासाठी हे प्रेशर पॉलिटिक्स असल्याचेही सांगितले जात आहे. अग्निवीर ही मोदी सरकारची महत्वाची योजना असल्याने त्यापासून माघार घेणे, सरकारला नामुष्की ठरू शकते. त्यामुळे या योजनेत काही बदल करण्याचा विचारही सरकारकडून केला जाऊ शकतो.