Hit and Run : आंध्र प्रदेशात खासदाराच्या मुलीने भरधाव कारने चिरडल्याने एकाचा मृत्यू ; काही तासांतच जामीनही मिळाला!

Andhra Pradesh MPs daughter Hit and Run Case :आंध्र प्रदेशचे माजी मुख्यमंत्री जगन मोहन रेड्डी यांच्या वायएसआर काँग्रेस पक्षाच्या खासदाराच्या मुलीने कारने चिरडल्याने एका मद्यपीचा मृत्यू झाला आहे. या घटनेनंतर खासदाराची मुलगी घटनास्थळावरून पळून गेली होती.

त्यानंतर, तिला पोलिसांनी शोधून अटक केली गेली. मात्र, काही वेळातच तिला पोलीस ठाण्यातूनच जामीन मिळाल्याने, याची सर्वत्र चर्चा होत आहे.

पोलिसांनी दिलेल्या माहितीनुसार, आरोपी वायएसआर काँग्रेस खासदार बिदा मस्तान राव यांची मुलगी माधुरी आहे. माधुरीच्या कारने बेसंत नगर भागात रस्त्याच्या कडेला पडलेल्या एका मद्यधुंद व्यक्तीला चिरडले, परिणामी त्याचा मृत्यू झाला.

या अपघातात जीव गमावलेल्या व्यक्तीचे नाव सूर्या असल्याचे सांगण्यात येत आहे. सोमवारी संध्याकाळी सूर्या मद्यधुंद अवस्थेत चेन्नईच्या बेसंत नगर भागात फूटपाथजवळ रस्त्याच्या कडेला पडून होता.

दरम्यान माधुरी आणि तिची मैत्रीण प्रवास करत असलेली भरधाव कार त्याच्या अंगावरून गेली. टायगर वरदचारी फर्स्ट क्रॉस स्ट्रीटकडे वळल्यानंतर हा मद्यधुंद अवस्थेतील रस्त्यावर पडलेला व्यक्ती त्यांना दिसला नाही, असा आरोपींचा दावा आहे.

अपघातानंतर स्थानिक नागरिकांनी घटनास्थळी गर्दी केली होती. या घटनेचा एक व्हिडिओही समोर आला आहे, ज्यामध्ये माधुरीची मैत्रीण स्थानिक लोकांशी वाद घालताना दिसत आहे. व्हिडीओमध्ये ती असे म्हणताना ऐकू येते की त्यांनी सूर्याला रुग्णालयात नेण्यासाठी रुग्णवाहिका बोलावली आहे. रुग्णवाहिकेला फोन केल्यानंतर स्थानिक लोकांच्या संतापामुळे त्या घटनास्थळावरून निघून गेल्याचे आरोपींचे म्हणणे आहे.

दरम्यान चेन्नई पोलिस अधिकाऱ्यांनी सांगितले की त्यांनी खासदाराची मुलगी आणि तिच्या मैत्रिणीचा ज्या क्रमांकावरून रुग्णवाहिका मागवली होती त्याचा माग काढला. कारची नोंदणी पुद्दुचेरीमध्ये झाल्याचेही समोर आले आहे. मृत सूर्याची पत्नी विनीता हिच्या तक्रारीवरून पोलिसांनी गुन्हा दाखल केला आहे.

(Edited by - Mayur Ratnaparkhe)