NCP National Committee : राष्ट्रवादीची राष्ट्रीय कार्यकारिणी जाहीर; आव्हाडांवर सोपवली मोठी जबाबदारी

मुंबई : राष्ट्रवादी काँग्रेसची (NCP) राष्ट्रीय कार्यकारिणी (National Committee) आज (ता. १६ सप्टेंबर) सायंकाळी पक्षाचे राष्ट्रीय उपाध्यक्ष, खासदार प्रफुल्ल पटेल यांनी जाहीर केली. राष्ट्रीय अधिवेशनात जाहीर झाल्याप्रमाणे शरद पवार (sharad Pawar) हे पक्षाचे राष्ट्रीय अध्यक्ष असतील, तर पटेल हे उपाध्यक्ष असतील. यामध्ये एक उपाध्यक्ष, सहा जनरल सेक्रेटरी, पाच राष्ट्रीय सचिव असणार आहेत. माजी मंत्री जितेंद्र आव्हाड (Jitendra Awhad) यांच्यावर राष्ट्रवादीने जनरल सेक्रेटरीपदाची जबाबदारी सोपवली आहे. जयंत पाटील यांच्याकडे राष्ट्रवादीच्या प्रदेशाध्यक्षपद कायम ठेवण्यात आले आहे. (NCP National Executive Committee announced)

राष्ट्रीय उपाध्यक्ष प्रफुल्ल पटेल यांच्या सहीचे पत्रक पक्षाकडून प्रसिद्ध करण्यात आले आहे. त्यामध्ये सुनील तटकरे आणि जितेंद्र आव्हाड या महाराष्ट्रातील दोघांकडे जनरल सेक्रेटरीपद देण्यात आले आहे. हेमंत टकले यांच्याकडेही राष्ट्रीय सचिवपद देण्यात आलेले आहे. वर्किंग कमिटीत शरद पवार, अजित पवार, सुप्रिया सुळे, छगन भुजबळ, तटकरे, पटेल यांचा महाराष्ट्रातून समावेश करण्यात आलेला आहे. कायम निमंत्रित सदस्यांमध्ये एकूण १६ जणांना संधी देण्यात आली असून दिलीप वळसे पाटील यांचा त्यात समावेश आहे.

राष्ट्रवादी काँग्रेसकडून २१ राज्य आणि सहा केंद्रशासित प्रदेशचे अध्यक्ष जाहीर करण्यात आले आहेत. त्यामध्ये महाराष्ट्राचे प्रदेशाध्यक्षपदाची जबाबदारी जयंत पाटील यांच्याकडे कायम ठेवण्यात आली आहे. मधल्या काळात अजित पवार यांच्याकडे विरोधी पक्षनेतेपद देण्यात आल्यानंतर पाटील हे नाराज असल्याची चर्चा रंगली होती. मात्र, त्यावर जयंतरावांनी पुण्यात बोलताना मीच पक्षाचा अध्यक्ष असल्याने मी कसा नाराज असेन, असे स्पष्टीकरण दिले हेाते. या कार्यकारिणीचे वैशिष्ट्य म्हणजे जितेंद्र आव्हा यांच्यावर प्रथमच राष्ट्रीय जबाबदारी देण्यात आली आहे.

दरम्यान, राष्ट्रवादी महिला काँग्रेसचे अध्यक्षपद खासदार फौजिया खान यांच्याकडे कायम ठेवण्यात आले आहे. सुप्रिया सुळे यांच्याकडे युवती काँग्रेस, धीरज शर्मा यांच्याकडे युवक अध्यक्षपद, सोनिया दुहान यांच्याकडे राष्ट्रवादी विद्यार्थी काँग्रेसच्या राष्ट्रीय अध्यक्षपदाची जबाबदारी असणार आहे.