Pahalgam Terrorist Attack : 'टाळूवरचे लोणी' खाणाऱ्या विमान कंपन्यांना सरकारने आणले ताळ्यावर

Pahalgam Terrorist attack : पहलगाम दहशतवादी हल्ल्यानंतर संपूर्ण देश शोकसागरात बुडाला आहे. या हल्ल्यात आतापर्यंत 26 जणांचा मृत्यू झाला आहे. तर 20 हून अधिक गंभीर जखमी झाले आहेत. एका बाजूला ही स्थिती असताना दुसऱ्या बाजूला जम्मू-काश्मीर खोऱ्यात हजारो पर्यटक वेगवेगळ्या ठिकाणी अडकून पडले आहेत. भयभीत अवस्थेमध्ये असलेल्या या सर्वांची घरी परतण्यासाठी धडपड चालू आहे. त्याचवेळी विमान कंपन्यांनी भाडेवाढ केल्याने देशभरातून संतप्त प्रतिक्रिया पुढे येत होत्या. पण अवघ्या काही तासात सरकारने या कंपन्यांना ताळ्यावर आणले आहे.

मंगळवारी (22 एप्रिल) दुपारी हल्ला झाल्यानंतर अडकून पडलेल्या पर्यटकांनी काश्मीर खोरे सोडून घराकडे परतण्यास सुरुवात केली. मात्र जम्मू-श्रीनगर महामार्गावर काही ठिकाणी दरड कोसळल्याने दोन्ही बाजूंची वाहतूक बंद आहे. केवळ श्रीनगरमधील एक रस्ता वाहतुकीसाठी सुरू असल्याने पर्यटकांना परत येण्यासाठी विमान प्रवासाशिवाय दुसरा कोणता पर्याय शिल्लक राहिला नाही. त्यामुळे पर्यटकांनी श्रीनगरहून दिल्ली आणि मुंबईसाठी विमान पकडण्याचा प्रयत्न सुरु केला. पण विमान कंपन्यांनी अचानक भाडे 20 हजारांच्या घरात नेले होते. रात्रीपर्यंत तर हे दर तब्बल 32 ते 36 हजारांच्या घरात गेले होते.

आपत्कालीन परिस्थितीत विमान कंपन्यांनी कृत्रिम दरवाढ केल्याने पर्यटकांची गैरसोय होऊ लागली. लोकांच्या भीतीचा फायदा घेऊन दर वाढवल्याने विमान कंपन्यांवर जोरदार टीका होऊ लागली. विमान कंपन्यांच्या नफेखोरीमुळे टुरिझम कंपन्या आणि पर्यटकांकडून संताप व्यक्त करण्यात येत होता. अखेरीस या प्रकरणात केंद्र सरकारला हस्तक्षेप करावा लागला. केंद्राने एक परिपत्रक काढून कंपन्यांना विमानांची संख्या वाढवावी आणि अशा प्रसंगी तिकिटांचे दर वाढवू नये असा आदेशच द्यावा लागला. त्यानंतर श्रीनगर-दिल्ली आणि श्रीनगर-मुंबई रुटवरचे दर जैसे थे झाले.