Lok Sabha Security Breach : आरोपी आता घडाघडा बोलणार; दिल्ली पोलिसांनी उचललं महत्त्वाचं पाऊल

Parliament Security Breach : लोकसभा घुसखोरी प्रकरणात अटक करण्यात आलेल्या आरोपींची पॉलिग्राफ चाचणी करण्यासाठी दिल्ली पोलिसांनी महत्वाचं पाऊल टाकलं आहे. पोलिसांच्या विशेष सेलने पटियाला हाऊस कोर्टाकडे त्यासाठी परवानगी मागितली आहे. पोलिसांनी गुरूवारी दाखल केलेल्या अर्जावर दोन जानेवारीला सुनावणी होणार आहे.

संसदेचे हिवाळी अधिवेशन (Parliament Winter Session) सुरू असताना १३ डिसेंबरला लोकसभेत (Lok Sabha) दोन युवकांनी घुसखोरी केली होती. त्यानंतर संसदेच्या सुरक्षेचा मुद्दा ऐरणीवर आला. या प्रकरणात तपास यंत्रणांकडून सहा जणांना अटक करण्यात आली आहे. सध्या हे सर्वजण कोठडीत आहेत. दिल्ली पोलिसांसह (Delhi Police) इतर केंद्रीय तपास यंत्रणांकडून या प्रकरणाचा तपास केला जात आहे.

तरुणांनी घुसखोरी का केली, यामागे नक्षलवादी किंवा दहशतवादी संघटनांचा काही सहभाग आहे का, याअनुषंगाने तपास यंत्रणांची चौकशी सुरू आहे. त्यानुसार आता सर्व आरोपींची पॉलिग्राफ चाचणीसाठी परवानगी मिळवण्यासाठी दिल्ली पोलिसांनी न्यायालयात अर्ज केला आहे. अतिरिक्त सत्र न्यायाधीश डॉ. हरदीप कौर यांच्यासमोर दोन जानेवारीला त्यावर सुनावणी होईल.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

पॉलिग्राफ चाचणी म्हणजे काय?

एखादी व्यक्ती किंवा आरोपी खोटं बोलत असेल तर पॉलिग्राफ चाचणीमध्ये त्याच्या शारीरिक क्रियांमध्ये होत असलेले बदल टिपले जातात. त्यासाठी एका मशिनचा आधार घेतला जातो. काही प्रश्न विचारल्यानंतर मशिनच्या स्क्रीनवर मानवी हृदयाचे ठोके, रक्तदाब, नाडी यांचं निरीक्षण केले जाते.  त्यामध्ये संबंधित व्यक्ती खरं की खोटं बोलत आहे, याची खातरजमा केली जाते. 

व्यक्तीने दिलेली माहिती शंभर टक्के खरीच आहे, याबाबतही अनेकदा साशंकता व्यक्त केली जाते. त्यासाठी विविध प्रश्नांवर दिलेल्या उत्तरांची सांगड घालावी लागते. त्यातून मग पुढील तपासाची दिशा निश्चित केली जाते. यापूर्वीही अनेकदा महत्वाच्या गुन्ह्यांमधील आरोपींची अशी चाचणी करण्यात आली आहे.