Modi-Meloni : "मोदी-फडणवीस चोरीचा माल आहेत", काँग्रेस नेत्याचं वादग्रस्त विधान; मोदींना म्हणाले, मेलोडीचा पोरखेळ...

Taliban 'Vergin Girl' Law : लग्नासंबंधी कुमारीका मुलींबाबत तालिबानचा नवा कायदा! धार्मिक न्यायालयांची वाढवली पॉवर

Modi-Meloni : पंतप्रधान नरेंद्र मोदी हे सध्या पाच देशांच्या दौऱ्यावर आहेत. यांपैकी मोदी सध्या तिसऱ्या देशात म्हणजेच इटलीत आहेत. याठिकाणी त्यांनी इटलीच्या पंतप्रधान जॉर्जिया मेलोनी यांच्यासोबत द्वीपक्षीय चर्चा केली. त्यानंतर दोघांमधील काही हलक्या फुलक्या क्षणांचे फोटोज सोशल मीडियावर व्हायरल झाले. एका व्हिडिओत तर मोदींनी मेलोनींना भारतातील पारलेचं मेलोडी हे प्रसिद्ध चॉकलेट गिफ्ट दिलं. यावरुन मोदींना मोठ्या ट्रोलिंगला समोरं जावं लागलं आहे. त्याच्यावर विरोधीपक्ष नेते राहुल गांधी यांनीही सडकून टीका केली. त्यानंतर मुख्यमंत्री फडणवीसांनी राहुल गांधीवर पलटवार केला. यावरुन आता काँग्रेसचे इतर नेते आक्रमक झाले असून महाराष्ट्राचे माजी प्रदेशाध्यक्ष नाना पटोले यांनी मोदी-फडणवीसांना थेट चोरीचा माल असं संबोधलं आहे. त्यांच्या याविधानामुळं वाद होण्याची शक्यता आहे.

नाना पटोले नेमकं काय म्हणाले?

"नरेंद्र मोदी आणि देवेंद्र फडणवीस हे चोरीचा व डकेतीचा माल आहेत. ईव्हीएम मॅनेज करणे, बोगस मतदार याद्या, एसआयआर सारख्या वेगवेगळ्या मार्गाने जनतेचा मतदानाचा अधिकार डावलून केंद्र आणि राज्यातील सरकारी यंत्रणांचा वापर करून लोकशाहीचा खून भाजपने केला आहे. लोकसभेतील विरोधी पक्षनेते राहुल गांधी यांनी देशाची आर्थिक स्थिती, विदेश नीती, बेरोजगारी, पेपरफुटी आणि महागाई या मुद्द्यांवर उपाययोजना करण्यात आलेलं अपयश आणि जनतेला काटकसर करण्याचा उपदेश देत स्वतः पाच पाच देशाच्या दौऱ्यावर पळून जाण्याच्या प्रधानमंत्र्यांच्या कृतीचा विरोध केला आहे.

तसेच विदेशी महिला पत्रकाराच्या प्रश्नाचे उत्तर न देता मान खाली घालून देशाची गरिमा धुळीस मिळवण्याच्या कृत्याचा विरोध केल्याने फडणवीसांना मिरच्या झोंबल्या आहेत. देवेंद्र फडणवीस यांनी राहुल गांधी यांच्याबद्दल अपशब्द वापरण्याऐवजी पंतप्रधानांना देशाच्या मूलभूत प्रश्नांपासून पळून न जाता हिंमतीने उपाययोजना करण्याचा सल्ला द्यावा व विदेशात महिला पंतप्रधानांना मेलोडी चॉकलेट गिफ्ट देऊन खी खी ख्या ख्या करत पोरखेळ चाळे बंद करण्याचे उपदेश द्यावेत, असंही पटोले यांनी म्हटलं आहे.

"नीट पेपरफुटीमध्ये सीबीआयने अटक केलेले दहा पैकी सहा आरोपी हे महाराष्ट्रातील आहेत. पेपर सेट करणारेच पेपर फोडत आहेत, राज्याचे गृहखाते काय करत आहे? राज्याच्या गृहमंत्र्यांनी राज्यातील गुन्हेगारी कमी करण्यावर लक्ष द्यावे. खासदार राहुल गांधी यांच्यावर असांस्कृतीक भाषेत टीका करण्याएवढी आपली उंची नाही हे लक्षात ठेवावे. बाकी जनता कोणाला फेकू, खोटेंद्र आणि अनाजीपंत म्हणते हे आम्हाला चांगल्या प्रकारे माहिती आहे पण असं बोलणं ही काँग्रेसची संस्कृती नाही" असंही नाना पटोले यांनी म्हटलं आहे.