Rahul Gandhi news : शहांवरील टीकेचा डाव उलटताच राहुल गांधी आपल्याच सरकारवर भडकले; जाहीरपणे चूक सांगत तातडीने तोडगा काढण्याबाबत ठणकावले

Jharkhand student protest : झारखंडमधील विद्यार्थी आंदोलक आता अधिकच आक्रमक झाले असून त्यांच्याकडून विधानसभेला घेराव घातला जात आहे. यादरम्यान पोलिसांकडून विद्यार्थ्यांवर सौम्य लाठीचार्ज, पाण्याचा मारा करण्यात आला. विद्यार्थ्यांना रोखण्यासाठी तारेचे कुंपण लावण्यात आले होते. पण त्यानंतरही आक्रमक झालेल्या विद्यार्थ्यांनी विधानसभेकडे कूच केले आहे.

दिल्लीतील आंदोलक विद्यार्थ्यांवर झालेल्या लाठीचार्जनंतर काँग्रेस मोदी सरकारविरोधात प्रचंड आक्रमक झाली आहे. लोकसभेतील विरोधी पक्षनेते राहुल गांधी यांच्याकडून सातत्याने केंद्रीय गृहमंत्री अमित शाह यांच्याकडून सभागृहात निवेदनाची मागणी केली जात आहे. त्यातच आता काँग्रेसची सत्ता असलेल्या झारखंडमध्ये विद्यार्थ्यांवर लाठीचार्ज झाल्याने राहुल गांधींची कोंडी झाली आहे.

राहुल गांधी यांनी या लाठीचार्जवर पहिली प्रतिक्रिया देताना सरकारवर नाराजी व्यक्त केली आहे. शांतपणे आंदोलन करणाऱ्या विद्यार्थ्यांसोबतच हिंसा कधीच मान्य केली जाणार नाही, मग ते कोणत्याही राज्यात असो, असे त्यांनी म्हटले आहे. झारखंडमध्ये विद्यार्थ्यांवर बळाचा वापर करणे चुकीचे आहे. विद्यार्थ्यांना शांततेत आंदोलन करण्याचा अधिकार आहे, असेही त्यांनी म्हटले आहे.

झारखंडमध्ये झारखंड मुक्ती मोर्चा आणि काँग्रेस आघाडीची सत्ता आहे. या सरकारला सल्लाही राहुल यांनी दिला आहे. चर्चेतून तोडगा निघू शकतो. झारखंड सरकारने या विद्यार्थ्यांचे ऐकून घेत त्यांच्या मागण्यांवर तातडीने तोडगा काढायला हवा, अशी थेट भूमिका राहुल गांधी यांनी घेतली आहे. दरम्यान, भाजपकडून आता राहुल गांधींवर निशाणा साधला जाऊ लागला आहे.

दिल्लीतील लाठीचार्जवर बोलणारे राहुल गांधी झारखंडमधील पोलिसांच्या कारवाईवर बोलणार का, असा सवाल भाजपचे खासदार तेजस्वी सूर्या यांनी केला आहे. त्याचप्रमाणे भाजपच्या इतर नेत्यांनीही राहुल गांधी आणि इंडिया आघाडीवर टीका केली आहे.