Ram Mandir Scam : राम मंदिर चोरी प्रकरण: 40 दिवसांत 70 वेळा डल्ला! SIT अहवालात धक्कादायक खुलासे; बडे मासे रडारवर!

अयोध्येतील राम मंदिरातील दान चोरी प्रकरणात एसआयटीच्या प्राथमिक तपास अहवालातून अनेक धक्कादायक बाबी समोर आल्या आहेत. मंदिरातील सुरक्षा आणि आर्थिक व्यवहारांच्या देखरेखीबाबत गंभीर त्रुटी आढळल्याने या प्रकरणाने मोठे वळण घेतले आहे. अहवालानुसार, 27 एप्रिल 2026 ते 5 जून 2026 या कालावधीत तब्बल 70 वेळा दान रकमेवर हात साफ करण्यात आला. विशेष म्हणजे केवळ 40 दिवसांत एवढ्या मोठ्या प्रमाणात चोरी झाल्याने व्यवस्थापनाच्या कार्यपद्धतीवर प्रश्न उपस्थित होत आहेत.

तपासादरम्यान समोर आलेल्या सीसीटीव्ही फुटेजमध्ये काही आरोपी दानपेट्यांमधून नोटांचे बंडल काढताना स्पष्टपणे दिसत आहेत. मंदिरातील दानपेट्यांच्या मोजणी प्रक्रियेत असलेल्या अनेक त्रुटींमुळे ही चोरी दीर्घकाळ सुरू राहिल्याचे एसआयटीने नमूद केले आहे.

6 फेब्रुवारी 2025 रोजी लागू करण्यात आलेले कडक सुरक्षा नियम कालांतराने शिथिल करण्यात आले. दानपेट्यांची स्वतंत्र नोंदणी आणि मोजणी नियमितपणे होत नव्हती. मोजणी प्रक्रियेवर आवश्यक नियंत्रण नसल्याने गैरप्रकारांना वाव मिळाला. याशिवाय सीसीटीव्ही कॅमेऱ्यांवरील सतत देखरेखही करण्यात आली नाही. मोजणी कक्षात प्रवेशासाठी असलेल्या नियमांचे पालन झाले नसल्याचेही तपासात स्पष्ट झाले आहे.

कर्मचाऱ्यांची नियमित झडती घेतली जात नव्हती, तसेच त्यांच्या वैयक्तिक वस्तूंची तपासणीही केली जात नव्हती. निर्धारित ड्रेस कोडची अंमलबजावणी न झाल्याने सुरक्षा यंत्रणेमध्ये आणखी ढिलाई निर्माण झाली. आरोपींनी याच त्रुटींचा फायदा घेत दानरकमेची चोरी केल्याचा निष्कर्ष एसआयटीने नोंदवला आहे.

या प्रकरणानंतर देशभरातून तीव्र प्रतिक्रिया उमटल्या. वाढत्या दबावामुळे श्री रामजन्मभूमी तीर्थक्षेत्र ट्रस्टचे महासचिव चंपत राय आणि विश्वस्त डॉ. अनिल मिश्रा यांनी आपल्या पदांचा राजीनामा दिला. मात्र, आर्थिक व्यवहारांच्या देखरेखीतील निष्काळजीपणाबाबत त्यांच्यावर टीका कायम आहे. आतापर्यंत 8 जणांना अटक करण्यात आली असली तरी या संपूर्ण प्रकरणातील मोठ्या जबाबदार व्यक्तींवर कारवाई होणार का, याकडे सर्वांचे लक्ष लागले आहे.