उत्तराखंडमध्ये ऐतिहासिक नोंद ; भाजपने दिली एका महिलेकडे मोठी जबाबदारी

नवी दिल्ली : उत्तराखंडमध्ये (uttarakhand)भाजपने सत्ता स्थापन केली असून पुष्कर सिंह धामी हे (Pushkar Singh Dhami)दुसऱ्यांदा मुख्यमंत्रीपदी विराजमान झाले आहे. याबरोबर उत्तराखंडच्या राजकारणात पहिल्यांदाच एका महिलेची विधानसभेच्या अध्यक्षपदी निवड करण्यात आली आहे.

माजी मुख्यमंत्री बीसी खंडुरी यांची कन्या ऋतु खंडूरी (ritu khanduri)यांची उत्तराखंड विधानसभेच्या अध्यक्षपदी निवड करण्यात आली आहे. राज्याच्या पहिल्या महिला विधानसभा अध्यक्ष म्हणून त्यांची नोंद झाली आहे. उत्तरांखडच्या निर्मितीनंतर पहिल्यांदा एका महिलेची या पदावर निवड झाली आहे.

उत्तराखंड भाजपचे प्रदेशाध्यक्ष मदन कैाशिक म्हणाले, ''ऋतु खंडूरी यांची एकमताने विधानसभा अध्यक्षपदी निवड करण्यात आली आहे. त्या राज्याच्या पाचव्या विधानसभा अध्यक्षा आहेत,''

2022 च्या विधानसभा निवडणुकीत भाजपाकडून त्यांनी कोटद्वार येथून निवडणुक लढवली. त्यांनी कॉग्रेस सुरेंद्र नेगी यांचा पराभव केला. त्यांनी मंत्रीपद मिळेल, अशी चर्चा होती. पण विधानसभा अध्यक्षपदाची जबाबदारी त्यांच्याकडे सोपविण्यात आली आहे.

कोण आहेत ऋतु खंडूरी

ऋतु खंडूरी या उत्तराखंडमधील पौड़ी गढ़वाल जिल्ह्यातील राधाबल्लभपुरम येथील रहिवाशी आहेत. ऋतु खंडूरी यांचा जन्म 29 जानेवारी 1965 रोजी एका लष्करी कुटुंबात झाला. त्याचे वडील भुवन चंद्र खंडूरी हे लष्करात होते. वडीलाच्या सतत होणाऱ्या बदलीमुळे त्याचे शिक्षण विविध ठिकाणी झाले. त्या पदवीधर असून त्यांनी पत्रकारितेची पदविका घेतली आहे.

त्याचे पति राजेश भूषण बेंजवाल हे बिहार कॅडरचे सनदी अधिकारी आहेत. सध्या ते मोदी सरकारमध्ये केंद्रीय आरोग्य सचिव आहेत. ऋतु खंडूरी या समाजकार्यात सक्रीय आहेत. त्यांच्याजवळ 7.26 कोटी रुपयांची संपत्ति आहे.